Ka United Democratic Party (UDP) da kyntait ko wa daw em i ktah ya ka seiñ haka Election MDC wa daw man neidaw wa ya krehlang hapoh ka sorkar MDA-II, wa yahkhmat da ka National People’s Party (NPP).
“Ki kaam wa ki mat hapoh ka sorkar wa ki kaam hapoh ka District Council yaphær ki bak-la-bak wei ym kwah wow pynyakhleh lang ya ki mat. I yaphær toh iwa boon wei ym em i ktah ya ka seiñ”, da ong u Working President ka UDP uwa man u MDC ka liang pyrchah ha KHADC, u Titosstarwell Chyne.
Hawa pynkynmoo wa ka UDP da chah kynjet noh ha ka NPP na ka Executive Committee ha KHADC, heiwa ka NPP da chna ko ya ka Executive wa thymme wa ki MDC ka Congress, da ong u, “Lada ka NPP ye ko wow ya krehlang wa ka Congress hapoh ka Executive Committee, kammon u ktah ya i”.
Ha iwi won i liang, hawa kylli hajrong i pynbna ya ki kyrtong UDP ha ka kylla wa ar, u Titos da ong u wa i pynkhreh waroh dadep neibynta ka thup wa ar ki kyrtong, wei neiliang ka seiñ daw pyrchang ko wow pynsmat noh yei pynbna sa kattu katni ki pyrtuid hachwa yong ka Christmas.
Uwa yahkhmat ka UDP da pyntip u leh wa i pynbna ya ki kyrtong u man ki chibhah chibhah, neibhah wa hap wow bichaar bniah ya ki kyrtong kiwa da paan Ticket, khamtam wa ka Party da booh thong ko wow pynyakhun ha waroh 29 tylli ki Constituency ha KHADC wa JHADC.
Discussion about this post