Ha iwi i jia hei miet ka 15 tarik uni u bnai, ki damok kiwa suba toh kiwa dai drugs dih drugs da mih ki deiwa boon na ka ktem Lum Survey deilang ki tiar pynmynsoo wei da yoh ki wow lute ya ka poisa wa Rs. 5000 na uwi u khynroo Khasi heiwa da dat da bom ki oo hadooh wa mynsoo.
Heiyatoh wa ini wa jia neiliang ka Hynñiewtrep National Youth Front (HNYF) Lumparing wa Laban Circle mar ya tip yeini wa jia da hiar ki cha katai ka thaw yow e yarap ya utai u khynroo uwa da chah lute wei chah pynmynsoo ha kiwa suba toh kiwa dih drugs.
Katkam ki khubor wa da e da uwa yahkhmat ka HNYF Lumparing Circle, u Jeff Sohtun da pyntip wa mar ya poi ki dkhot ka seiñ ha katai ka thaw da em kamwa 50 ngut ki kynthai wa chynrang kiwa suba kiwa dih drugs kiwa da toor wei hiar thma deiwa rah ki tiar wa nep ya ki dkhot ka seiñ.
Hei yakhun ki dkhot ka seiñ ya kitai kiwa suba kiwa dih drugs da yut noh ki chapoh ka ktem Lum Survey wei ka seiñ da yoh ko wow ksoh ya ki kattu katni ngut ha katai ka jooh ka miet.
Chooh chooh ha kani ka miet najrong ki dkhot ka HNYF, ki pulit leh da emlang ki wei da suba kiwa dih drugs da kawang ki da ki klong kiad ya ki dkhot ka seiñ wa ki pulit ha kani ka thaw.





Discussion about this post