Ka Sarot I Man ka dhab yong ki 11 ngut ki chilok, da em ko ka thong wow e snaam sñiawbha chisien chisnem cha ka Jowai Civil Hospital Blood Centre kawa em ha pyrchah ka Panaliar Secondary School, Panaliar, Jowai, heiwa ha ka 5 tarik uni u bnai da pynman biang ko ya ka Blood Donation Camp.
Ya ka yalang tbian da pynlai da u Riquoma Rq. Laloo kam u dkhot heijooh i por da yoh ya ki kyntien na ki dkhot ka seiñ, heiwa u Sienmitre Sumer, da e u ki kyntien ngohhblai, u Shape Pasweth won da e u ki kyntien chaphang ka Sarot I Man, katwa u Jait Dao Sumer da e u ki kyntien e khublei.
Ka Dr. I. Khyriem, Senior Medical Officer kawa pait ya katai ka Blood Centre, da e ko ki kyntien tbian deiwa yaroh ya ka Sarot I Man, kawa man kawi na ki dhab kawa em sakhiat i kitkhlieh wow yarap ya kiwa emkaam. Ong ko wa ka Voluntary Blood Donation e yarap ko chiboon, ymtoh du kat ya ki bru wa emkaam, wot ya kani ka Blood Centre leh yoh ko u booh yei snaam wow e jhan cha kiwa dawa manda li paan ki. E bor e mynsien haroh ko ya kiwi wow wan ki chakhmat, neibhah manda e snaam, pynchait pynkhiah ko ya i doh yong kiwa e wot yei pyrkhat pyrdaiñ ki leh. Da e yumut ko ya ka Sarot I Man wow pynsñiawthooh ya kiwi deiwa e kam ki kynja Awareness Programme heiyatoh wa ini yoh kiwi leh u sñiawjan u wan chakhmat.
Hei klam u Shape Pasweth, da khana tbian u ya ka parom ka Sarot I Man, deiwa ong u kattu la soo sien dadep e snaam ko heini i jooh i thaw. Ong u wa em ki i thmu wa nachwa wow lai yarap cha ki chnong da ki sula ki that næ ki baam. Tangwa manda pyrkhat sani bha, dachem wa i e snaam sñiawbha man i iwa emkaam bha wow yoh u yarap yei mynsien bru, kamtæ da pynman ya kam kani ka e snaam sñiawbha khlieh u snem. E khublei kyrpang u ya kiwa da e snaam kiwa nachwa wa kiwa katni, yei mynsien sbun yong ki wow mih chakhmat hei wow e yei snaam yong ki chirup wa ka Sarot I Man.
Kiwa ya embynta hei wow e snaam toh u Kyllimot Lhuid, u Ram Sumer, u Mariabud Paswet wa u Sienmitre Sumer kiwa man ki dkhot ka Sarot I Man. Neitæ em haroh kiwi ki lok wa ya chimbyntalang, u Firsterborn Dkhar, uwa man u Lecturer ka Jaiñtia Eastern College, Khliehriat, u khynroo Arsa Shylla na Panaliar, Jowai wa u Heibor U Tre Syngkon, waheh chnong ka Dorbar Chnong Tpep Pale, Jowai.
Hachwa wow pynkut, u Riquoma da khana tbian u yei lai luti ka Sarot I Man kawa man kawa em itæ i mynsien wow yarap kyllooid ya kiwa emkaam i dawa kat i bor wa ye ko. Khut u leh yei ya ksohkti kiwi leh neibynta i bha ha ka imlang sahlang.
Discussion about this post