Ka Pt. NEHU-Deen Dayal Upadhyay Community College (DDUCC) for Skill Development Centre, Wahiajer ha ka 30-04-25 ta pynkut ko yei e sikai chet Cake wa ki baam dih cha namo ka Bakery kawa 7 sngi kawa sdang nadooh ka 23 tarik hadooh ka 30 tarik u bnai wa dep.
Ha kani ka yalang pynkup burom ya kiwa da pyndep ya kani ka e sikai da wan wow sakhi da u Alfred Kharbani, Audit Officer (Retd) kam u kongsan, u Latu Nartiang, Branch Manager ka Meghalaya Co-Operative Apex Bank Ltd., Ummulong Branch kam u symbood kongsan wei da emlang u Sanwotki Laloo, waheh chnong Wahiajer wa kiwi de.
Ki waheh hawa e yei klam da yaroh ki ya kiwa pynlai yong kani ka College wei da pynchlur ki ya kiwa chimbynta wow pynlai yumut hei buit i stat wa da yoh ki lyngba kani ka e sikai wow pynpliah yei chemphang yong ki hei bynta yong ka kaam Bakery kamjooh leh wym hoi u mylliñ ki u kheiñkor yei por wa kordor yong ki.
Da ong ki leh wa kam kani ka e sikai hajrong ini i bynta man ko kawa emkaam bha wow pyntikna yei sñiawthooh chaphang ki rukom yoh yarap lyngba ki Bank kamjooh i chait i khiah wei i sñiaw chngaaiñ kiwa thied man ko kawa kongsan hawa bood yei kaam khayi iwa pynchong yurim hei pynmih ya ki jait baam waphær waphær.
Kiwa e yei klam kynthup ya u Dr. F.R. Sumer, Librarian NEHU uwa da khana yei sñiawsuk yong oo u yoo yei pynlai yumut ki khynroo khyllood yong ka imlang sahlang hei wow ya emlang ha kani ka e sikai wa emkaam katwa nang pynkhreh ki pyn ya ki hi wow man kiwa pliah hei kaam Bakery. Da pynchlur u ya kiwa chimbynta wow pait bniah ki yei tip i stat wa da yoh ki lyngba ini i e sikai wei wow yoh myntoi ki kamjooh wow nangroi kani ka kaam chet baam.
Ini i thmu man i kam chibynta i e kti wa rap yillu yong ka DDUCC/NEHU neibynta u pynku yei tip i stat, i roi i paar ha ki bynta waphær waphær kam chibynta ka NEP 2020, kawa man katkam i thmu yong u (L) Pandit Deen Dayal Upadhyay.
Kani ka e sikai man ko kawa jop wei da pynman ko ya ka College wow yoh yei yaroh wei kyrchaan wa khroo na ki paidbah yong ka imlang sahlang kamjooh i stat i chemphang lyngba i jait e sikai waphær waphær wa da pynlai da kani ka College neipor cheipor.
Da pynkut ya ka yalang deiwa saam ya ki Certificate cha ki khynnah wa chah sikai wei da e yei kyntien e khublei na u Wolnish Rymbai, Program Co-ordinator ka DDUCC.
Discussion about this post