Yaleh pyrchah ki Khasi wa chongdai yei thmu kyrriah ka sorkar, ym mih ki baar jylla chakhmat

Kiwa chongdai madan ha Khyndailad, khamtam ki Khasi da pyneh bait ki trait wym mih hawa ki pulit deilang ka Shillong Municipal Board (SMB) chirup wa ki bor District ka East Khasi Hills da phah mih noh ki na kani ka thaw cha ka thaw wa da pynchna neibynta yong ki.

Ini i wan beh da jia i ynne i step nadooh na Umsohsun chadooh Khyndailad, tangwa manda poi ha Khyndailad kiwa chongdai madan kynthai wa chynrang da pyrchah joor ki yeini wa wan beh ya ki.

Ka Municipal toh kawa dadep pynbna paidbah da ka tanghæng ha ka tayaaw wa dadep wa kitu kiwa chongdai kiwa da yoh ya ka Certificate yow tipmit da ka sorkar wa toh u mih noh ki na kini ki thaw cha ka thaw wa da chna ka sorkar jylla wei da e por khaddooh hadooh ka 22 tarik u Naiynru 2025.

Ka Municipal da phah ko ya kini kiwa chongdai madan wow lai chong ha ka mala wa ar ka Parking ka MUDA wei ha ka Parking mar pyrchah ka SBI, kiwa dadep chna pynbiang ka sorkar.

Ha ini i yakhih da em ar tylli ki seiñ kiwa dai madan wa kynthup ya ka Meghalaya and Greater Shillong Progressive Hawkers and Street Vendors Association (MGSPHVA) wa yahkhmat da ka Biolin Pyrtuh wei kawi won ka seiñ toh ka Shillong Road Side Hawkers Association (SRSHA), wa yahkhmat da ka Telmi Nongbri.

Kiwa yahkhmat ka Meghalaya and Greater Shillong Progressive Hawkers and Street Vendors Association (MGSPHVA) da kam ki wa em duna 5000 ngut ki dkhot kiwa chongdai madan ha Shillong, katwa ka Shillong Road Side Hawkers Association (SRSHA) da em ko kamwa 100 ngut ki dkhot.

Related posts

Chah dat pynmynsoo ki Khasi wa sah ha Kalakhal ha ki Mia Muslim ka Cachar District ka Assam | Maham ki leh wow slaitbor ya ki khynnah kynthai

August 17, 2025

Da pynkup bor ya kiwa ksohkaam thymme PPC wa KBB wa haap hapoh ka Namdong Parish

August 17, 2025

Kam wow kdaw heini wa ka sorkar da pynkhreh ko wow pynman ya ka thaaiñ Khyndailad kam ka thaw wym chah u chongdai namo ka No Vending Zone khnang wow wanrah yei khooid wei miat kawa man kam ka thaw wa boon ki bru kiwa wan wa lai na kylleiñ yow pait ke.

Ha ini i ya pynyoo bor wei pynyoo nia da mih ki kynthai wa ki chynrang Khasi katwa ki baar jylla ym em mih ki chakhmat wei da suki hi-eh wei pait donhi ki.

Hadien wa mih noh ki bor sorkar na kani ka thaw da mih sa i yaknieh thaw hapyrdi kiwa chongdai madan heiwa kawi ka manbei Khasi wa uwi u baar jylla da yakam tre ki yei thaw chongdai ha Khyndailad heiwa da mih i yamai ha kani ka thaw kawa man leh kam ka luti lai paidbah.