Ha iwi i jia wa phylla bha, uwi u pulit wa man kam u Constable ka Vidisha District ka Madhya Pradesh da ye u wow sai tulop kawa dapoi Rs. 28 lak neibynta ki 12 snem khlem da lai kreh chisien leh.
Uni u Constable da yoh kreh u hapoh ka Madhya Pradesh Police ha u snem 2011 wei da thung kreh nyngkong ya oo ha Bhopal Police Lines. Hadien kattu katni por da phah ya oo wow leh u ya ka Basic Police Training ha Sagar Police Training Centre katkam ka rukom. Tangwa uni u bru ym em lai u cha kani ka Training wei da liwan u cha yung u wa em ha Vidisha khlem da khana, da ong ka Assistant Commissioner of Police (ACP), ka Ankita Khaterkar.
Heithaw wow pyntip næ wow chim chuti na ki heh u, da phah u ya ka Service Record u cha Bhopal Police Lines lyngba ka Speed Post. Wei manda yoh ya kini ki kot ki sla u da pdiang ya ki khlem da kylli iyi iyi wei khlem da pyntikna wa da pyndep u ya ka Training wei khlem da kylli lada lai kreh u, da khana chooh chooh ka ACP.
Ym em leh ki bru wa em ha ka Training Centre kiwa da kdaw yeini wym em wan u wei ym em leh kiwa na Bhopal Police Lines wa kylli chaphang ini.
Ki bnai ki snem da lai ki khlem da wan kreh uni u Constable chisien leh wei ka tulop wa da su cha oo man-u-bnai da lai bait ko heiwa dapoi ko palat Rs. 28 lak khlem da wan yooh kjat hapoh ka Police Station næ cha ka thaw pynman Training.
Manda poi u snem 2023, ka chnat pulit da leh ki yei pait ya kiwon wow pynku tulop neibynta ki 2011 Batch, heiwa da chem yeini. Hawa thooh ya oo ym em wa chem ya oo ha thaw kreh wei ym em leh wa tipmit næ kiwa kynmoo yei dur u. Hadien wa pynman ya ka takit (Internal Inquiry), da thooh ya ki kot ki sla u tangwa ym em chem iyi iyi wa kreh u ha kawon kawon ka Case.
Ini da pynkhyrngiat wa kammon ini da lai i khlem da em wa johkhe la 12 snem wei manda phah wan oo yow kylli takit, da kam u wa chitom u hei bor pyrkhat pyrdaiñ wei da wanrah u leh ya ki kot ki sla yow pynyoo yei daw wym ye u wow wan kreh.
Ka ACP da pyntip ko wa hanla ym em wan kreh u, tangwa i pyrtuid u da em bait i kam uwa kreh pulit wei ka tulop u da su khlem pep wei hadien 12 snem kamwa jooh leh da pynman yei pait yei pynku tulop da chem yeini waroh tangwa uni u Constable da e daw u wym tip u yeini waroh wei neidaw wa chitom u ym ye u wow leh yeini waroh.
Hadooh kattæ da pynuiñ u Rs 1.5 lak cha ka chnat wei daw su ya kawa sah deiwa ah na ka tulop wa daw yoh u wei da phah ya oo wow kreh u Bhopal Police Lines, da pyntip ka ACP.
Da pyntip ko leh wa hadooh kattæ ka takit dang lai ko chakhmat wei daw pynchitom ya kitu ki wym em chem yeini wa bakla tangwa neidaw wa uni u bru dadep thung kreh ya oo dang man hi u kam uwa kreh pulit.
Discussion about this post