Ka JHADC ha ka sien wa nyngkong da chna Record ko hajrong i chong ya ka dorbar ha ka 20 tarik kawa da neh palat 7 kynta heiwa da sdang ko nadooh i por 10:30 i step wei kut ko hadooh 5:30 i janmiet.
Kani toh ka Dorbar Tlang wa da khut pynman du neibynta chisngi, wei ha kani ka dorbar da sdang chwa da ka kynta kylli yutip pynche na ka Executive Committee, i wanrah ya ka Official Report wa i chimbynta ki MDC ka Liang Pyrchah wow wanrah ya 7 tylli ki mat yaklam namo ki Motion hapoh ka dorbar.
Hadien wa da kut ka dorbar neiliang uwa yahkhmat Liang Pyrchah, u Awhai Andrew Shullai da pynsñiaw u i sñiawsuk heiyatoh wa kani ka dorbar wa da pynman neibhah boon iwa kylli ki MDC ka Liang Pyrchah da yoh ki yei jubab iwa hun wei iwa ym hun kamjooh wow wanrah leh ya ki Motion heiyatoh ki mat yaphyllu waphær waphær wa da wanrah da oo wa kynthup leh u Rikut Parieñ, u Daeimi Liam, u Grecentus Susngi, u Jamshaphrang Pohtam wa u Nehemaia Lamare.
Iwi wa sñiaw diaw won ki MDC ka Liang Pyrchah kajiak ong u toh wa ka Council ym bien ko u pynman dorbar kawa ar sngi wei dang boon leh ki wow kylli ki MDC ka Liang Pyrchah yei wym pu yoh u kylli iwa da pynsahnood ya ki neibhah wa da e laad ya ki du chi kynta donhi.
Da ong u wa ynne da pynyoo wa em i baam-tooh iwa che ka Executive Committee ka Council deiwa chna ya ki Slip khian wow khrong Rs. 300 na kawi ka Truck khlem em bood ya ki kyndon aiñ ka Forest.
Heiyatoh wa ka tulop leh u Andrew Shullai da ong u wa ympu che neibhah u CEM nachwa ong u wa da em ka soskular wa ka sorkar jylla wow su, tangwa kattæ won da pynkylla noh najrong kiwi won ki mat yaklam.





Discussion about this post