Chah e FIR u In-charge ka Phramer Traffic Cell

Ka seiñ Pnar Student Movement (PSM), ka Jaiñtia National Council (JNC) Western Zone deilang wa uwa ri syiar wa tip kam u Armington Lapasam, ynne da lai e FIR ki ha u SP ka West Jaiñtia Hills pyrchah ya u In-charge ka Phramer, u SI. A. Iawphniaw deiwa pynbaad wa yarap u ya kiwa khayi syiar kiwa khlem da biang ki kot ki sla.

Ha ka FIR da ong wa ka PSM, ka JNC deilang ka kiwa ri syiar hapoh ka Poultry Farming Association ka West Jaiñtia Hills ha ka 1 tarik uni u bnai hadien wa tip ki wa em ki kari kit syiar kiwa wan na Nagaon, Assam wow chalan pyrchah ya ka aiñ chapoh ka jylla khlem da em nadooh ki Challan, GST wa ki Medical Certificate, kamtæ da lai ki wow pait ya kini ki kari ha Phramer heiwa da chem wa em ar tylli ki kari wa kit syiar kiwa wan na Assam wei da ksoh ki heiwa da chem wym em ki ya ki kot ki sla wa biang.

Ha kani ka jooh ka sngi da lai booh FIR pyrchah ya kini kiwa emkti wei thmu wow chalan ya kini ki syiar khlem ki kot ki sla tangwa neiliang u In-charge ka Phramer Traffic Cell da kyntait u wow pdiang ya ka FIR deiwa ong wa da yoh u ya ka Challan, GST wa Medical Certificate neibynta kini ki syiar wa da phah cha oo da u Additional SP lyngba u WhatsApp tangwa hadien ini da pdiang u ya ka FIR.

Da pynbaad wa heipor wa chim ya ka Statement kiwa e FIR, da maham uni u In-charge ya kiwa e FIR deiwa ong wa daw chah khut ki hakhmat ka yung bichaar wei daw Register Case pyrchah ya ki wei da ong u wa ye ki wow e Case pyrchah ya oo ha ka High Court næ ha ka Supreme Court.

Hadien ini won da chem wa uni u In-charge da pynlait u ya kini ki kari wa kit syiar hanla ym biang ki ya ki kot ki sla deiwa hun yeiwa da phah cha oo lyngba u WhatsApp da u Additional S.P.

Related posts

Da wai ya ka thaw sait kari wa thymme hajan Ialong Tollgate

August 30, 2025

Kyrchaan ki le chnong ya ka Public Hearing ka Topcem

August 30, 2025

Ha ka sngi wa bood da lai ki cha Phramer Traffic Cell yow kylli yei daw wa pynlait ya kini ki kari tangwa u In-charge ym bien u wow yachem wa ki wei ym em pynyoo u leh ya kitæ kot ki sla wa da yoh na u Additional SP.

Da chem leh wa ka FIR wa da e ha ka sngi chwa ym em Register ka pyrchah ya ki ar tylli ki kari wa kit syiar wei da pynlait wow lai kini ki kari khlem da bood ya ki kyndon ka aiñ.

Kamtæ da ong wa uni u heh pulit ym em leh u yei kaamram u katkam wa da pynkit da ka aiñ wei i rumkom pynlait ya kini ki kari toh iwa da yoo suba wei da suba leh wa da em i baam tangka hadooh wow pynlait ya kini ki kari khlem da Register Case pyrchah ya ki.