Ka seiñ Jaiñtia National Council (JNC) ha ka 10 tarik uni u bnai da lehkmen ko ya u moomær dap 10 snem i lai luti wow chakri ya ka imlang sahlang ha chirup i sakhilang ki para yahkhmat seiñbhalang na kiwi tawon ki seiñ, kiwa yahkhmat ka Synjuk Ki Waheh Chnong Ri Jaiñtia, ki manbei manpa, ki khynroo khyllood, ki waheh wasian wa chah khut sñiawbha wa kiwi de.
Ha kani ka sngi lehkmen ka seiñ JNC, da pynkup burom haroh ko ya ki khynnah wa lehbha ha ka Exam SSLC yong uni u snem, da pynkup burom leh ya ka bei u President warim ka seiñ uwa da khlaad noh, u (L) Shanbok L Syad, neitæ i pynkup burom wa kyrpang ya u laad pathai khubor wa nyngkong hei ktien Pnar u “Wyrta”.
U President ka HYC uwa man leh u Chairman ka COMSO, u Roy Kupar Synrem hawa e yei klam ong u lyngba kani ka lyngkhooh dap snem, i mynsien yakhun leh u nangkyrooh i chaphrang ym u kut du hei lehkmen.
Wei kam ka Bri U Ynñiawtrep wa khian paaid toh u man kiwa yatylli khnang yow ye yakhun ya kiwi tawon ki bor wa thmu u thombor u pyndooh jait ya ka jaitbru yong i.
Da pynkynmoo u yei jia waphær waphær ha ki snem wa chadien, wei heiyatoh waka aiñ Citizenship Amendment Act deiwa ong lymtoh wa yakhun pyrchah ki bru Khasi Pnar ha u snem 2019, ka jaitbru da wiar hi ko, tangwa deiwa mih yakhun, ka sorkar bei leh da pynlait noh ko yaka Meghalaya naka CAA wa em ka Sixth Schedule.
Da pynkynmoo haroh u wa iwa khor dooh i eh wa maad ka jaitbru katni toh i poor smat i drugs, wa yeini toh u chim kitkhlieh da warohlang yow pyntikna wa ini i jait dih wa pynsih ya ka jaitbru u dooh jait i.
“Iwa suk dooh u pyntlot ya kawon kawon ka jaitbru toh lada ki khon khynroo khyllood ngop ki hei drugs wa kiwi ki kaam wa sih haka imlang, kamtæ i yoh psiah suk i drugs ha kani ka ri yong i ye u man i kaam i buit poh kiwi tawon ki jaitbru yow pynjæd ya ka ri ka jaitbru yong i,” da ong u Roy Kupar Synrem
Neiliang u President ka JNC, u Sambormi Lyngdoh hawa klam da ban joor u yei emkaam i yatylli deiwa ong ka kjut wa yoomaa katni toh i ya adnood bichni.
“Hei lailuti ka seiñ hanla i yakhun ka JNC neibynta u pynpsiah yei ktien Pnar haka State Anthem da man iwa jop, ym pu hun ko neibhah kamwa yaka jylla Meghalaya da pynwandur ya ki Khasi, Garo wa Pnar, wei kamwa ka ktien Garo ktien Khasi da psiah ko hapoh ka Meghalaya State Language Act, kwah i wa ka ktien Pnar leh u psiah ko,” da ong u Sambormi Lyngdoh.
Ong u kam ki dkhot ka JNC ymhoi u chah yahbakla ha ki bru wa mut u tympiah jaitbru, tangwa ka seiñ hi dawa ko ya ka luti wa toh yow pynneh pynsah yei ktein Pnar wa da kyrkhu da ki warim.
Khana haroh u wa hei lai luti wa 10 snem ka seiñ da maad ko chiboon i eh i khor, i chah tynjooh ha ki bor ka aiñ hawa mih yakhun dawa yei hok ka ri ka jaitbru.
Lyngba kani ka lehkmen dap chiphaw snem khut kyntu kyrsu haroh u ya ki seiñ waphær waphær, ki paidbah ka ri ka jaitbru wow e ki i yakrehlang wa ka seiñ ha ki sngi ki snem wa chaphrang.
Ha ka yalang wa pynlai da ka Ristina Nongtdu, ka Education Secretary warim ka JNC, da yoh leh yei parom tbian hajrong i lai luti kani ka seiñ na u General Secretary, u Wanshwa Suting, da pynchongchit dei rwai na u General Secretary hi wa i chaad tynre na ki khon khynroo khyllood.
Discussion about this post