Kitbok ka Wapungskur ya u Dr. Heipor Uni Bang chwa wow lai chim ya ka National Teachers’ Day Award

Ka Dorbar Chnong Wapungskur da kitbok kitrwiang ko ya u Dr. Heipor Uni Bang hachwa u lai chim u ya ka National Teachers’ Award 2025 ha Delhi.

Neiliang u Dr. Heipor Uni Bang da pynsñiaw u yei kmen mynsien yeini wa da leh ka dorbar chnong hachwa u lai chim u ya ka khusnaam na ka President ka ri, ka Droupadi Murmu ha ka 5 tarik u Naikhynde ha New Delhi deiwa ong wym em kyntien de u deiwi wow pynsñiaw yei kmen mynsien wei ym sñiaw khonswet de u manda lai cha Delhi neibhah da emlang ka chnong wa oo.

U Secretary chnong ka Wapungskur, u Aristotle C. Rymbai da pynsñiaw u yei kmen wa khroo wei yaroh leh ya u Dr. Heipor Uni Bang uwa da wanrah burom wei naam ya ka chnong kawa da tip kattu da waroh kawi ka ri India wa ka chnong Wapungskur da sai ko ya kiwa sikai wa stat tam.

Neiliang won u waheh chnong ka Wapungskur, u Posling Dkhar hawa e yei klam da pynsñiaw u yei kmen wa khroo wei da yaroh u ya u Dr. Heipor Uni Bang wa em kam uni u waheh ha ka chnong uwa da noh kyllooid cha ka imlang sahlang khamtam heiyatoh wa i tip i stat ki khon yong ka chnong wa ki para chnong wa marjan neibhah deiwa leh u Dr. Heipor hadooh ki khon ka chnong kiwa duna hei doh i pran da yoh ki wow pyndep yei puræ puthi yong ki ha K.B. Memorial Secondary School Wapungskur kawa man ka skur wa seiñ da u Dr. Heipor hi.

Related posts

Yap 8 ngut wei mynsoo 14 ngut hadien wa yatyrrah ka rel wa kit bru wa kawa kit mar

November 4, 2025

Phah ka Committee ka High Court wow tympra ya ki 33 tylli ki karkhana Coke hapoh ka jylla

November 4, 2025

Kani ka skur da wanrah naam ko leh man-u-snem ya ka chnong deiwa lehbha ki khynnah ha ka SSLC Exam.