U President ka HNYF West Jaiñtia Zone da paan RTI u heiyatoh wa ki kaam pynroi ha ki chnong hapoh sor Jowai ha ka 25-06-2026 na ka Jowai Municipal Board wei da kyrpaad u wow pynman ya ka Joint Inspection hadien wa yoh ya ka jubab ha ka 06-08-2026.
Ha ka 11-09-2026 da pynman ya ka Joint Inspection wa ki sahep ka Jowai Municipal Board, deiwa khut ya kiwa thoh khubor tangwa da chah beh noh ki ha ki sahep ka Board.
Ha ka Joint Inspection da chem wa ka JMB toh u niaam rong (Paint) ko ha i lut wa Rs. 1,24,81,380 heipor wa man ka Meghalaya Game chirup wa u sarok Jowai -Shillong Road hadooh ha Mookyndur na “Welcome To Jaintia Hills” kamjooh na Ummulong cha Wahaiajar hadooh Madan Lait Chnong ka Wahiajar wei na laad Kiang Nangbah College cha Mihmyntdu wei na Mihmyntdu cha Tre Tangliang Ialong tangwa ha ka Inspection ym chemdien wa em itæ i ñiaam rong.
Ka JMB da pynkreh ko leh ya ki Footpath ha ki chnong ka sor Jowai wa ka umdih heiwa ha ka Inspection ka seiñ da ong ko wa ym em pynkreh ya ki Footpath wa ka um dih katkam wa da mang heiwa kini ki luti lai kjat man ki kamni ha wah:
i. Ha Iongpiah, Jowai heiwa da mang Rs. 10,00,016 neibynta 423 Meter tangwa da kreh won du 197.7 Meter wei da sah 225 Meter khlem kreh.
ii. Ka luti lai kjat ha Salaroh, Jowai heiwa da mang Rs.6,49,685 neibynta 247.5 Meter tangwa da kreh won du 195 Meter sah won sa 52.2 Meter.
iii. Ka luti lai kjat ha Chahtngit, Jowai heiwa da mang Rs. 32,00,008 neibynta 1265 Meter (1.265 Km) wei da pynkreh du 210 Meter heiwa da sah 1055 Meter (1.055 Km) khlem kreh.
iv. Ka um-dih namo Water Reservoir (Drinking Well) ha Chahtngit, Jowai heiwa da mang Rs. 8,00,093 ka wow yillu 6 Meter, tangwa da kreh ya kawa yillu du 2 Meter donhi khlem bood ya ki kyndon wa da mang. Ka seiñ da pynbaad ko leh wa kiwa sah ha Chahtngit ym em de u pynemkaam ki ya ka neidaw wa ymtoh i kreh katkam wa toh u man.
v. Ka luti lai kjat ha Khliehiongriang, Jowai ha i lut wa Rs. 9,99,473 neibynta 409 Meter kawa khlem kreh katkam i chem na ka Inspection ha ka 11-09-2026.
Ka seiñ da ong ko wa ka Joint Inspection kawa sdang heipor 12:00 waje pyrdi sngi da pynkut noh heipor 3:30 i sngi wei kiwa kreh ka JMB da liwan ki khlem iwon iwon i daw.
Da ong leh wa da kyrpaad ya ka JMB wow pyndep ya ka Inspection lyngba u PIO, u Hunbaitmiki Passah wow pyndep ya iwa dang sah na ka Joint Inspection wa man ha ka 11-09-2026 heiwa kiwa dang sah toh ha Sabahmuswang, Iawmusiang hajan Shiv Mandir wa ha Khimusngiang.
Chooh chooh da ong ko wa ha ka 22-10-2026 da thoh cha ka Chief Executive Officer (CEO) ka Board neibynta Report na ka Joint Inspection tangwa hadooh katni ym em u yoh ya ka jubab na ka CEO.
Discussion about this post