Iwi i Video wa riñ hapoh ka rel Erode–Jogbani Amrit Bharat Express (Train No. 16601) da poor bha i ha ki Social Media, heiwa da chah riñ uwi u bru wa sait ya ki yusong song baam kiwa man kam ki Disposable Food Container ha i thaw sait kti hapoh kani ka rel iwa da pynchrai ya ki paidbah wa pait ya ini i Video deiwa ong wa kamni man ko iwa maa ya ki bru wa baam da ki baam wa chet hapoh ka rel.
Uni u bru da suba toh uwa kreh kam uwa chet wa saam baam hapoh ka rel wei da yoo wa da pynlang bha u ya kini ki yusong dei miat.
Hawa kylli uwa riñ ya ini i Video ya uni u bru ym ye u wow jubab deiwa che deiwa ong wa pynkhooid donhi ki ymtoh yow pynemkaam biang.
Neiliang ka Indian Railway Catering & Tourism Corporation Ltd, South Zone hadien wa poor kani ka khubor da pynche ko wa da pynman ko yei takit heiwa da chem uni toh uwi na kiwa dai baam (Vendor) wei da pynlang u ya kini ki yusong baam deilang ki klong Plastic chirup ki synduk kot wei da sait u ki yow lai dai yow yoh nong u malu mal wei yeini da leh khlem da tip kiwa pynlai ya ka Pantry Car kawa chet yei baam ya kiwa lai luti.
Chooh chooh da ong wa uni u bru da e kti u ya kini ki mar cha ki bru wa pynlang ya ka kam kini tiar kiwa yang ha kiwa boon ki Station wei ymtoh wa pynemkaam yow song baam biang ki.
Da ong leh wa waroh i baam wa e cha ki bru toh kiwa dang dep chet wei kiwa da wanrah na ki thaw chet wa da tipmit da ka IRCTC katkam ki kyndon.
Kamtæ da kyntu ya ki paidbah wym toh u mutdur sih ki neiwa poor ini i Video.
Discussion about this post