I pdung Dynamite ha krem mooyong wa em ha Mynsngat, Thangskoo, East Jaiñtia Hills ynnin ka 5 tarik da wanrah i yei yap ki 19 ngut heiwa i thooh ya kiwi hapoh krem dang pteiñ i hadooh ynne ka sngi.
Ynne ka sngi ki bor pulit wa chipai nadooh ki NDRF, SDRF, F&ES, BSF wa kiwi da pteiñ ki wow thooh ya kiwa dang wiar kiwa da ngait wa dang chah tlep chah ban ki hapoh ki ar tylli ki krem mooyong.
Da sakhi wa ki lok ki jor kamjooh kiwa ha-yung ha-sem kiwa dang wiar da em ki harood wow yang ya ka khubor iyi wa jia ya kiwa maya yong ki.
Napyrdi kiwa boon walang da em ka tymmen kawa yaam piah-nood wa ka khynnah wa 4 snem ha chrooh kti yong ka. Kani ka tymmen toh ka Tara Devi Dev Malakar heiwa u khon yong ka, u S. Malakar uwa kreh ha ini i thaw dang wiar u hadooh ynne i sngi wei ka khynnah toh ka khon u.
Ka Tara da khana ko wa u kurim ko da yap u wei ka toh kawa na Tripura wei wym em de wa psa ya ka wa ka ksu lait na u khon ko.
Chooh chooh ka Tara da kylli ko kattu kammon u psa ko ya kani ka ksu ko? Wei ka toh kawa kreh mylla donhi heini, deiwa yaam piah-nood hawa khana yeini.
Kani ka khynnah hawa kdung ya ka Beipun dei chong da yaam ko wow thooh ya u pa yong ka deiwa kylli “Cheiwon u Pa neh Beipun”?
Discussion about this post