Sihlet O yeiwa da klam, ong u Sunil Deodhar hawa pynche yeiwa dawa paan maap ka BJP Meghalaya

U Sunil Deodhar uwa man kam u National Secretary warim ka BJP, da jubab wei da pynche u yeiwa dawa ka BJP Meghalaya wow paan map u yeiwa klam u ha ka Indigenous Faith Conference wa da pynman ha Pynter, Pynursla Sub-Division, East Khasi Hills District.

Da ong u wa oo toh u bru wa burom bha ya u Jisu Khrist wei uwa maya ya ki Christan wei ym em u yei thmu wow pynmong yei sñiaw yong ki wei lada iwa klam u toh mih i kam iwa khlem da tip u burom, da sihlet bha u yeini.

Da pynche u leh wa ini wa klam u ha ka Indigenous Faith Conference toh hajrong ka phang wow pynneh pynsah wei yada ya ki niam tynre wei iwa klam u toh hajrong ini wei ym em mut u wow klam pyrchah ya ki Christan næ kawon kawon ka niam.

Da ong u leh wa da jan dap 20 snem lyngba ka My Home India kawa man ka seiñ kreh monsñiawbha yong oo da kreh yajan bha wa ki bru na Northeast kiwa boon toh ki Christan. Wei deiwa sñiawthooh yeiwa chah lehbeiñ ki khynroo khyllood ka thaaiñ Northeast ha kiwi ki thaw ka ri, da sdang u ya ka National Helpline ha waroh ka ri iwa da leh 20 snem nachwa. Lyngba kani, ki hajar ngut ki Christan ka Northeast da yoh yarap deilang i yahluti.

Related posts

Khih u khmi wa khlanbor 5.5 uwa da sñiaw leh cha Meghalaya

February 25, 2026

District Cricket League: Jop ka Shangpung ya ka Evergreen Mukhla Mission

February 25, 2026

Lyngba kani ka seiñ da jooh pynman leh ya ki lehkmen Advance Christmas neibynta ki khynroo khyllood kiwa man kam ki Christan kiwa im jngai na ki yung ki sem ki ha India. Da pynman leh kam kani chisien ha yung uwa yoh ya ka Bharat Ratna, u L.K. Advani heipor wa u Sunil man u kam u National Convener ka North East India Sampark Cell ka BJP.

Heijooh i por da ong u wa maya wei burom u ya ki Christan kamjooh leh maya wei sñiawkhia u ya kiwa bood ya ka Niam Khasi ka Niamtre da ki jaitbru Khasi wa Jaiñtia. Wei lada em na ki kiwa chah pyndooh yei roi i paar neidaw wym em ki ha ka niam wa heh paaid, wei lada klam neibynta yong ki, ymtoh u chim wa pyrchah ya kiwi ki jait niam.

Kamtæ da ong u wa hawa yieñ yaleh neibynta i hok wa man salonsar yong kawi ka jaitbru ym mut wa choon won ya kiwi. Neibhah i rukom pyrkhat heh paaid toh ka wym ye u pdiang. “Nga ngait O wa lada man uwi kam u Christan, toh u leh u wow bood yeiwa hikai wei wow pynneh ya ka niam u; lada em won uwa man kam u Niam Khasi næ Niamtre, ki leh hap ki wow sñiawsarong yeini i yongrim neibhah i bor ka India chong i hei wow tip u burom kylliang wei wow ya imlang.”

Da pynkut u deiwa ong wa ym em mut u wow ktah yei sñiaw yong kiwon kiwon neiwa klam u wei da sihlet u yeini neibhah oo ka thong u hawa im toh yow wanrah yei suk i saaiñ deiwa kduplang ya waroh wei wow pynyoh yei hok yong waroh ki jaitbru.