U Octomewot Lamin uwa jooh man kam u Nominated MDC haka samoi krehkaam warim ka JHADC itæ nadooh u snem 2019, wei ha kani ka kynti hadien wa da pynthymme yaka samoi krehkaam ka JHADC da jied wei thung biang ya oo kam u Nominated MDC.
Hajrong i chah jied wei thung biang ya oo kam u Nominated MDC, ynne ka sngi u Octomewot Lamin da lai baam smai u ha kamra krehkaam u Chairman ka JHADC, u Dr. Sankey Shangpung ha chirup i emlang u CEM ka JHADC, u Thombor Shiwat, uwa yahkhmat ka Liang Pyrchah, u Awhai Andrew Shullai deilang kiwi won ki para MDC.
Hawa e yei klam, u Octomewot da pynsñiaw u i sñiawngooh ya waroh ki MDC nadooh uwa yahkhmat ka Liang Pyrchah hajrong i ya krehlang waroh chi katu neibynta i bha ka Council, wot lada ka Council maad ko yei kyrdooh poisa najrong kiwi won i eh i khoo.
Kyrmen u wa i ya krehlang u nang pteiñ chooh chooh ko neini chakhmat hajrong kammon u pyntyllung ya ki kaam ka Council, wei neiliang yong oo leh u e u i ya krehlang.
U CEM hawa klam ong u ynne toh ka sngi wa da pyndap yei duna i em ki MDC neibhah sñiawthooh wa katkam i booh bait ryntih ki kyndon ka aiñ, ka JHADC toh u yoh ko uwi u Nominated MDC najrong ki 29 ngut kiwa da jied da ki paidbah, khnang yow biang i em ki MDC 30 ngut.
U CEM ong u lada kheiñ na waroh ki Nominated MDC kiwa chadien, u Octomewot Lamin toh uwa yoh yei por wa jrong tam kam u Nominated MDC ha kani ka Council wei kattæ sa ha kani ka samoi leh da chah jied biang u wow ya krehlang ya ki kaam ka Council. Ong u wa haki snem wa chadien da yoo ki wa u Octomewot toh uwa ya krehlang ha kiwa boon ki bynta ka Council deiwa em yei mynsiem kitkhlieh, kamtæ kyrmen u wa ha kani ka kynti leh u yoh biang ki i jooh i ya krehlang.
Discussion about this post