Ka seiñ FKJGP-East Jaiñtia Hills haka kyrwoh khubor wa da pynlait da u Information Secretary ka seiñ, u Michal Chyrmang, da ong wa hadien wa ka seiñ da yoo ko ini wa dep yei klam ha Assembly da uwi u MLA ka Liang Pyrchah hajrong ka phang Reservation Policy heiwa ong u wa toh u bhah 47% ka bhah thung kreh cha ki Khasi khlem da kynthuplang ya ka kyntien Jaiñtia heithaw wow ong Khasi-Jaiñtia, wei ini toh i bakla bha dei wym pynmih Khasi-Jaiñtia neibhah ka seiñ hi ka sñiaw wym toh u mylliñ ya ki Khasi-Jaiñtia wa Garo neibha ki manchwa longchwa da seiñdur ya ka Meghalaya da ki le tylli ki jaitbru kitæ ka Khasi-Jaiñtia wa Garo.
Hei yong sakhiat i ki nong Jaiñtia toh u em i jar jiar ka bhah thungkaam thungjaam neibhah wa da em jar jiar ka Autonomous District Council.
Hao ym ye wow len wa ki Khasi khara yong i toh ki paradoh parasnaam wei ki chi payu para yong i ki Jaiñtia, wei da man leh kam ki chi payu para wei yakit yabah deilang ya ki dawbah ka jaitbru. La haka ktien ka thylliej leh ym em da yaphær wot i rukom pyrkhat leh, tangwa kamwa da seiñdur hi ya ka jylla Meghalaya yong i da ki le tylli ki Autonomous District Council kitæ ka Khasi, Jaiñtia wa Garo toh u buromlang uwi ya uwi, heiwa ki longchwa manchwa da seiñdur ya ka jylla iwa mut wa da chynna jngai bha ki ymtoh deiwa leh biej, leh hakdak wei hawa ka sorkar pyrdi e ko ya ka jylla wa ki Autonomous District Council leh da bichaar thij pa thij wei wow pynwiar ya i kam ki nong Jaiñtia ym sñiaw yahaap wei i da beiñ joor i neibhah i da em ki ya ka Autonomous District Council yong i hi, wei iyi mut ka Autonomous District Council, u Ardent Miller Basaiawmoit tip bha u yei krehkaam yong ka.
Hao sñiawthooh wa u Ardent mut u wow pynyatylli ya ka jaitbru tangwa wow pynyatylli ym mut wow pyndooh yei kyntien Pnar/Jaiñtia, wei i yatylli chong ko deiwa maya, i burom uwi ya uwi khamtam u yatylli ya ki dawbah ka jaitbru Khasi-Jaiñtia wei ymtoh leh u mylliñ wa ka Jaiñtia em ko hadooh 7 ngut ki MLA yong ka, pynkut u Michal Chyrmang.
Discussion about this post