U MDC ka Amwi Khliehtyrshi, u Madonbai Rymbai uwa jooh man leh kam u CEM ka JHADC, da mih u chakhmat wow pynbaad ya ka Executive Committee ka JHADC deiwa ong wa ka EC hapoh i yahkhmat u CEM, u Thombor Shiwat ha ki 7 snem lynter nadooh ka EC warim hadooh kawa katni ym em wanrah ko kawi wot leh ka Bill hapoh ka yung dorbar ka Council neibynta u tei yei bha i miat ki jaitbru ka Ri-loom Jaiñtia.
Da kdaw u leh ya ki aiñ wa yoo emkaam u pynbha pynmiat kawa yatoh wa ka riti dustur wa kynthup ya ka aiñ waheh chnong, ki Dolloi wa kiwi ki bynta wa yoo emkaam u pynbha katkam wa yah ka juk.
Neitæ u booh ryntih wei tipmit da ka aiñ ya ka tang jait tang jur.
Ong u lada ym leh iyi iyi ym em yumut i man kam kiwa mihkhmat wa da jied da ki paidbah neibynta u yasaaid yei hok yong ki, heiwa da pynkynmoo u wa heipor wa man CEM da oo ha u 2013 da wanrah u yaka Bill “Proposed Amendment Bill yong ka Sixth Schedule” tangwa kani ka Bill dang sahteiñ bait ko ha u Officer In-charge ka Home Ministry uwa toh u pait ya ka Northeast.
Da kyntu u ya ka EC wa mar ya dep ka Budget Session 2026 toh u thooh laad u kreh chitom ko neibynta u wanrah ki Bill yow pynmyntoi ya ki paidbah.
Hawa kyruiñ u cha i jia ya kulmar ha Garo Hills mar ya sdang lai i thap pyrtuid ki kyrtong wa thmu yakhun Election MDC cha ka GHADC, ong u kani jia ko toh nei bakla joor hi ki waheh ha ki 25 snem nachwa lyngba ka GHADC hadooh wa kini kiyi kiyi waroh wan jia i ha ki jaitbru Garo.
Kamtæ ha JHADC leh ong u toh u thooh khnang yow lait u wan jia kam ini wa da jia ha Garo.
Neibhah waroh chi kattu hadooh katni ha JHADC ym pu em da kiwi won ki jaitbru wa yoh u chimbynta thap Vote cha ka JHADC næ wow yakhun Election, lait noh ha ka Election MLA hapoh ka jylla.
Wei mar ya jan poi ka Election MDC ha JHADC da jooh pait bniah yei pyrtuid kiwa thap Vote heiwa ya ki wym toh para jaitbru da kyrriah noh ya ki na ka thup Electoral Roll.
Discussion about this post