Kam chibynta ka World Tuberculosis Day 2026 kawa da pynman hajrong ka phang “Yes! We Can End TB” kawa da pynman ha ka 27 tarik uni u bnai da ka yung krehkaam u District Tuberculosis Officer (DTO), Jaiñtia Hills ha Khliehriat West Community Hall, Khliehriat.
Da e yarap dei baam lyngba ka yung krehkaam u DC cha ki 20 ngut kiwa chitom nei kjut TB.
Da pynkup burom leh ya kiwa boon kiwa kreh ka chnat i chait i khiah:
Ya i naam Best Mid-Level Health Providers (MLHPs), da yoh ka Manbhalang Myrlia na Narwan HWC (hapoh Sutnga CHC) wa ka Sumarlyne Mary Laloo na Iongkaluh HWC (Pamrapaithlu PHC).
Yei naam Best ASHA Performance da yoh ka Wanroiki Dkhar ka ASHA ka Iongkaluh HWC.
Yei naam Best Laboratory Performance da yoh ka Sutnga CHC katwa u Eladme Tariang u Pharmacist ka Lumshnong PHC da yoh u yei naam Best DOTS Provider.
Ka Dr. R. Toi, Senior Medical & Health Officer, Sutnga CHC da yoh ko yei naam Best Medical Officer.
Da pynbna leh yei pyrtuid ki 11 tylli ki chnong wa da lait na ka kjut TB (TB-Free Villages) heiwa ka chong Shyrwang da yoh ko ya ka Gold Category katwa ka Chiehruphi, Musiang Lamare New, Musiang Lamare Old, Thangskai, Wahiajer, Kremmyrsiang, Moopad, Shnongthymme, Kairang wa Nongrim Hills da yoh ki yei tipmit hapoh ka Bronze Category.
Da e khusnaam leh cha kiwa jop ha ka Drawing Competition kiwa da yabhah ar bynta.
Ha ka 1st Category, da yoh nyngkong ka Arkini Syrti na Khliehriat Higher Secondary School, hei wa ar da yoh ka Treri Yeini Patlong na Sutnga Presbyterian Higher Secondary School katwa hei wa le da yoh u Franki Dkhar na Wapung Higher Secondary School. Ki Consolation Prize da yoh ka Sofia Dkhar wa u Melvin Susngi kiwa na Little Star Secondary School, Ladrymbai.
Ha ka 2nd Category won da yoh nyngkong da u Bravely Paslein na Little Star Academy Secondary School, Khliehriat, hei wa ar da yoh u Duru Emi Malang na Khliehriat Higher Secondary School katwa hei wa le da yoh u Herni Darnei Nanglein na Little Star Secondary School, Ladrymbai. Ki Consolation Prize da yoh da ka Mehek Ansari na Little Star Secondary School, Ladrymbai wa u Redolency Grace Bamon na Moopala, SSA Upper Primary School.
Ka MLA ka Sutnga-Saipung, ka Santa Mary Shylla hawa e yei klam kam ka kongsan da ong ko wa ha ki phaw snem nachwa yei kjut Tuberculosis (TB) da kheiñ kam i kjut wa maa bha tangwa katni won da man i i kjut wa ye u sumaar lada chem smat ya kiwa yoh kjut.
Da ong ko wa ka sorkar da e ko leh ki dawai kiwa dei mynkna cha waroh kiwa phah sumaar TB nadooh ki Sub-Centre, ki Primary Health Centre (PHC) wa ki Community Health Centre (CHC).
Da pynchlur ko leh ya ki paidbah wow wan chakhmat yow leh Check-Up yow ye noh u pyndooh jait ya ini i kjut kat ha u snem 2030 katkam wa da booh thong.
Discussion about this post