Ha ka 24 tarik uni u bnai da yoh yei paan yarap deiwa em wa Phone ha u 1971, uwa man kam u Helpline Number ka sorkar Meghalaya uwa da sdang hapoh ka CM Connect heiwa da yoh wow lai pynlait ya uwi u khynnah wa em ha Kashmir.
Uni u khynnah toh uwa na Meghalaya wei da sahkut u ha Kashmir wei da pynbor ya oo wow kreh u hapoh kawi ka Restaurant deiwa chim kabu wow pynkreh boon kynta khlem da su poisa wei da chah lehbeiñ u leh hadooh wa da pyrkhat u wow pynkut yei mynsien.
Mar ya yoh Phone, da leh yeiwa emkaam yow pyntip cha ki bor ka Jammu & Kashmir heiwa da kreh khlem sangeh yow chem ya uni u khynnah.
Du hadien kattu katni kynta, ki bru wa kynthup ya u Assistant Labour Commissioner wa u Anti-Human Trafficking Unit ka Jammu & Kashmir da ye ki wow chem ya uni u khynnah heiwa da lai pynlait oo na kani ka thaw wa kreh u wei da li booh oo hapoh ka Shelter Home ka sorkar.
Da booh leh ya ka FIR wei ka takit da lai ko chakmat heiwa da phah leh ya ki tre Restaurant wow su ya ka nong wa dang sah uni u khynnah.
Ka sorkar da ong ko ini pynyoo ko wa krehkaam ka CM Connect kawa man ka rynsan wow yaklam wa kiwa chong chnong kawa da sdang nadooh u February 2024, heiwa da ye wow yaklam palat 70,000 sien wa kiwa chong chnong heiwa da em 20,000 sien kiwa da paan yarap wa da ye wow pynhun ki iwa man kamwa 95% i jop.
Kamtæ da ong wa ini wa jia ya uni u khynnah pynyoo ko leh wa hadooh katwon smat wow ye u e yarap ha i por wa biang.
Da ong leh wa lada emkaam yarap emkaam du wow Phone donhi wei ka CM Connect daw pyntikna ko wa poi i yarap deiwa smat wei lada lada em iwon iwon iwa emkaam ye wow Phone ha u 1971 neibhah uwi pa uwi uwa chong chnong em hok u wow pynap pynsñiaw yeiwa emkaam u.
Discussion about this post