Ka Jowai Diocese Catholic Youth Movement (JDCYM) da pynman ko ya ka Yaseiñ Yalap 2026 ha ka Balang Chnong Borghat, Lad Lakadong Parish, East Jaiñtia Hills District haka 25 wa 26 tarik uni u bnai wei da man ko kawa chitrhem wa chongkun deiwa wan chimbynta ki khon khynroo khyllood na ki Parish wa Unit waphær waphær wa haap hapoh ka Jowai Diocese nadooh ka 25 tarik.
Ha ka sngi sdang da pynman da ka Mass Wa Khooid, ka ngooh ka dem Blai da u Fr. Lawrence Paswet, Diocesan Youth Director ryngkat i synraanlang u Phadar Valan A, OMI Parish Priest Ladlakadong wei da wan wai pyrda da u Vincent H Pala, MP warim kam u kongsan katwa u Rishot Thubru, Ex-President JDCYM heithaw u Fourning Siangshai da wan u kam u symbood kongsan deilang kiwi kiwa chah khut sñiawbha.
Ha ka sngi sdang da yoh yei kyntien yalap na u Resource Person, u Rechard Syiemiong, Former Vice President & General Secretary ICYM Shillong Archdiocese kamjooh na u Lasolang I Jones Rymbai hajrong ka Financial Literacy.
Ha ka sngi wa bood won ka Sngi U Blai, da yoh yei kyntien pdiang burom na u Wellson Siangshai President ka JDCYM, wei hachwa u sdang ya ka Mass Wa Khooid da yahkhmat da u Bishop Ferdinand Dkhar.
Heipor noh chariñ sngi da yoh ya ka Mane Sacrament wa i klam pynsñiawthooh wei pharia ya ka ktien u Blai hajrong ka phang: “Kham lah u samla uba stad la u duk ban ïa u syiem tymmen uba beij” Koheleth 4:13, da ka Easter Gatphoh, Advisor ka JDCYM, pynbood won da i saam khusnaam cha kiwa jop ha ki yakob.
Ha ka Bible Quiz Competition da yoh nyngkong da ka Parish Khliehriat, ka Parish Mooksiang hei wa ar, katwa ka Parish Mowkyndeng hei wa le. Ha ka Bible Extermpore Speech Competition da yoh nyngkong da ka Jean K Dkhar na ka Parish Sutnga, hei wa ar ka Therisia Lytan na ka Parish Umkiang katwa hei wa le da yoh ka Robin Maria na ka Parish Amlarem.
Da pynkut ya kani ka yaseiñ yalap deiwa pynhiar ya ka lama ka seiñ da u Robert Marbaniang, Electrical Technician, Health Department, Shillong kam u kongsan ryngkat wa i sneiñ i kroo wei da pynbood dei klam e khublei na ka General Secretary ka JDCYM, ka Rilin Mary Shadap wa na u Rivaldo Swer, President ka Lad Lakadong Parish.
Ha kini ki ar sngi da pynphooh pynphieñ ya kani ka yaseiñ yalap ki khynroo khyllood deiwa pynchongchit da ka chaad ka kmen, ka put ka tem wa i rwai i siaw.
Discussion about this post