Ka Khasi Students’ Union (KSU) Shnongrim Unit da pynsñiaw ko yei sñiawkhia wa joor hajrong i klam yong u Secretary ka Elaka Nongkhlieh iwa da mih paidbah ha kini ki sngi. Wei ka seiñ sñiawthooh che ko wa itai i klam wa i maham ya ki seiñbhalang wym toh u wan tuklar hapoh ka Elaka, ye ko wow emyatoh wa i wan yong ka Shree Cement Ltd hapoh u pood u ang yong ka Elaka Nongkhlieh.
Tangwa neiliang ka KSU Shnongrim Unit ka pyrchah joor ko ya ka Public Hearing ka Shree Cement, wei da kwah wow pynche paidbah wa ka seiñ ym kynran dien ko na ka yurim yong ka wow yada yei hok mantre kiwa chong chnong hapoh ka Elaka waroh kawi wei u yieñ skem yow yada ya iwon iwon i thmu wa ye u ktah yei khyndaw u chyiap yong ki tre chnong deiwa yahbakla næ leh yabor yong ki bru kiwa khwan myntoi samen.
Da ong leh wa man iwa sñiawsih wow yoo wa heithaw u yada yei hok mantre kiwa chong chnong, em pathan kiwa pyrchang wow khanglaad ya ki seiñbhalang kiwa kreh chitom neibynta i bha i miat ka imlang sahlang hapoh chnong poh thaw.
Ka seiñ da kyntu ko ya waroh kiwa chong chnong yong ka thaaiñ Nongkhlieh wow man kiwa yatylli, kiwa husiar wei ymtoh u chah yahbakla ha kiwon kiwon ki bru samen kiwa pyrchang wow tympiah tympra næ i pyndooh noh yei hok yong ki paidbah wa chong chnong.
Discussion about this post