U Montri Rangbah ka Meghalaya, u Conrad K. Sangma ynne da yachem u wa u Union Education Minister, u Dharmendra Pradhan ha New Delhi yow pynsñiaw yei sñiawngooh yeiwa da pynbna paidbah wa da thooh ya u Vice-Chancellor wa thymme ka North-Eastern Hill University (NEHU).
Ha ka chiti wa da e kti ha u Dharmendra Pradhan, neiliang u Conrad da ong u wa ini wa da leh kattæ toh kawa emkaam bha wei kawa da pdiang sñiawbha da kiwa em hapoh kani ka skurbah wei da emkaam wow lai chakhmat deiwa smat wei deiwa pyrkhat bniah.
U Conrad da kyntu u leh wa hawa jied ya u VC wa thymme toh u chimkhia bha wei deiwa pyntikna leh wym toh u pynslem deiwa pyrkhat yeiwa emkaam ka NEHU.
Da ong u leh iwa emkaam bha toh wow jied ya u bru wa khlan bha ki kaam puræ puthi, uwa ye wow pynlai yei kaam wa emkaam man-ka-sngi, uwa chemphang, uwa stat u bichaar wei uwa ye wow man kam uwa yahkhmat wei yahluti ya ka NEHU ha kini ki por wa eh.
Kam wow kdaw heini wa ka Ministry of Education Department of Higher Education ka sorkar pyrdi da pynmih Advertisement ko neibynta wow khut ya ki bru wa biang yow man kam u Vice-Chancellor ka North-Eastern Hill University.
Kiwa yaleh hap ki wow yaleh da ka Online wei ka tarik wa khaddooh wow pynpoi yei pyrtuid toh hadooh ka 18-06-26.
Ha iwi won i liang, u Conrad da kyntu u ya u Dharmendra Pradhan wow tuklar u heiyatoh wa ki 5 tylli ki Project kiwa da Sanction hapoh ka Pradhan Mantri Jan Vikas Karyakram (PMJVK) neibynta ka North Eastern Hill University (NEHU), Tura Campus, Meghalaya kawa ym pu em dep u pynkrehkaam. Ka poisa wa Rs. 35 klur da pynlait da ka Ministry of Minority Affairs yow pynchna yeiwa emkaam.
Kam wow pynkynmoo wa ka Ministry of Minority Affairs da tyrwa ko ya ka CPWD wow pynkrehkaam yeini ha ka Review Meeting kawa da pynman ha ka 14 tarik u October 2025.
Discussion about this post