U Montri Rangbah ka jylla, u Conrad K Sangma, ynne da wan u cha chnong Lumshyrmit, East Jaiñtia Hills District yow booh mooyurim neibynta u sarok wa chongdor Rs. 76.43 klur uwa na Shkentalang cha Lumshyrmit (NH-206) uwa jrong 18.64 Km deilang ka yingkieñ najrong ka wah Myntdu yow pynyabi cha u sarok NH-6 ha Kongong kawa da kyrchaan da ka North East Special Infrastructure Development Scheme (NESIDS).
U Conrad hawa e yei klam da ong uwa ini waroh daw wai ko boon ki laad ki luti neibynta kiwa chong chnong ka thaaiñ nadooh ki kaam rep, u suk wow lai cha ki thaw sumaar, ki thaw puræ wei daw pynku ko leh ya ki kaam Tourism.
Da khana u wa dadep khut Tender neibynta ini wei da jied leh ya u Contractor.
Da ban joor u yeiwa emkaam u wanrah ya ki kaam pynroi deiwa pynneh pynsah yei yongrim wei waroh ki kaam wa da pynkreh yow man ki neibynta iwa bha neibynta kiwa chong chnong deilang ka rymaw.
“Ka sorkar da yaleh ko wow wanrah yei man salonsar deiwa embynta kiwa chong chnong hawa pynkreh ya ki kaam pynroi wei kawa ye u neh slem,” da ong u Conrad.
Da pynkut u deiwa pynsñiaw yei kmen wa da ye wow wan booh ya kini ki mooyurim deiwa e khublei leh ya u Symbood Montri Rangbah deilang u MLA ka thaaiñ yeiwa da ye wow wanrah ya kini ki kreh.
Discussion about this post