Ki Party kiwa da ya synroplang hapoh ka sorkar MDA-II, da rai ki wow phah ya u James PK Sangma cha Rajya Sabha hadien wa ka samoi krehkaam u MP wa katni daw kut noh ko ha uni u bnai.
Ki seiñ saiñpyrthai wa em hapoh ka sorkar MDA da mynjur ki yeini ha ka yalang kawa da man ynne ka sngi ha State Guest house, Shillong, heiwa da rai wow phah ya uwa yahkhmat ka NPP, u James Sangma cha Rajya Sabha neibynta ka samoi 6 snem.
Ya u MP Rajya Sabha daw jied da ki 60 ngut ki MLA ka Yung Dorbar Chna Aiñ ka jylla, wei kamwa man hi u kyrtong ka sorkar MDA daw yoh u yei jop deiwa suk neibhah wa boon paaid ki MLA wa em ha ka Liang Synchaar.
Ya ka Election MP cha Rajya Sabha daw pynman ha ka 18 tarik uni u bnai, wei i thap pyrtuid ya ki kyrtong hap wow pyndep hapoh ka 8 tarik.
Hawa pynbna yeini i rai, u Secretary ka Parliamentary Party yong ka MDA -II, u Paul Lyngdoh da khana u wa da em i tyrwa da kiwa boon na jar jiar ki Party tangwa ym em yoh ya u kyrtong uwa da hunlang kamtæ da rai wow bood ya iyi wa da jooh leh yow kyrchaan ya u kyrtong yong ka Party kawa heh paaid, wei hajrong ini da rai wei da mynjur ya u kyrtong yong ka NPP, u James PK Sangma wow phah cha Rajya Sabha.
Neiliang u Conrad Sangma uwa man u Chairman ka MDA kamjooh u Montri Rangbah, da khana u wa u James Sangma u lai thap pyrtuid u ha ka 5 tarik heipor kamwa 2:30 i sngi.
Discussion about this post