Ka War Jaiñtia Students’ Union (WJSU) ynne ka sngi da yaklam ko wa kiwa thoh khubor heiyatoh wa ki Truck ki baar jylla wa kamai hapoh ka thaaiñ War Jaiñtia heiwa da yoh i klam na u Senior Vice President ka seiñ, u Autumn Sumer wa u General Secretary, u Stalwos Pohkyrnu.
U Autumn Sumer da pynche u wa ka seiñ WJSU ym chong kli-kti ko wei wow kreh ko neibynta i bha i miat ka thaaiñ War Jaiñtia.
Da ong u wa heiyatoh wa i boon ki Truck ki baar jylla, neiliang ka seiñ da thoh wei da yachem ko ya u EM ka JHADC wa pait ya ka Trade hei emlang u EM ka Town Committee ka Council.
Ka seiñ da dawa wei kyrpaad ko ya ka JHADC wow chimkhia yei roi kini ki Truck wei wow leh katkam ki kyndon wa ki aiñ ka Council ya ki.
Neiliang ka Council leh da hiar ko wut-wut cha ka thaaiñ Dawki wow sylli ya kini ki Truck baar jylla heiwa da phah ya ki wow pynbiang ya ki kot wa emkaam.
Yeini i leh ka Council ka seiñ da dap ko dei sñiawngooh deiwa yaroh leh ya kiwa yahkhmat yong ka.
U Stalwos Pohkyrnu da phylla u ya kiwi ki para seiñ kiwa wan kynreh ya ki kot ki sla ki kari baar jylla ha ka 10 tarik uni u bnai hanlada ka District Council da leh ko yei kaamram nadooh ka 8 tarik uni hi u bnai.
Da ong u wa dadep thoh ka seiñ cha ka War Jaiñtia Truck Owners & Drivers Association wym hoi u leh chiliangkhmat heiyatoh wa ki kari baar jylla neibhah ka seiñ ym pyrchah næ kyrchaan ko yei e næ ym e Trading License cha kini ki kari baar jylla wei da e kti bait ha ka seiñ Truck ka thaaiñ neibhah wa kam ka seiñ man ko kawa smat wow kreh wa ka Association neibynta i bha i miat ka thaaiñ.
Chooh chooh da ong u wa ki baar jylla wan ki cheini lyngba i wanrah kiwa khayi neini hi neibhah hawa em ki Truck wym em kot em sla ym yohsa ki wow wanrah da ki kari baar jylla wow khih.
Discussion about this post