U Sub-Divisional Magistrate ka Sohra Civil Sub-Division da pynkrehkaam u da ka Section 163 ka BNS yow khang ya ka Weisawdong Falls neibynta kiwa uiñke suwari nadooh ka 3 tarik uni u bnai.
Ya kani ka hukum da pynmih hadien wa i ya kajia hapyrdi ka chnong Laitduh wa ka chnong Umblai da pteiñ i heiwa da yaknieh ya kani ka kchaaid Weisawdong yow pynlai ya ki kaam Tourism.
Ha ka 09-08-25 da pynmih ya ka hukum pynbait pood da u Syiem ka Hima Sohra katkam wa da phah u bru wa da thung ka KHADC yow pynbait yeini heiwa da e kti ya ka kchaaid Weisawdong cha ka chnong Laitduh.
Tangwa yeini i pynbait pood da pyrchah ka da kiwa boon ki liang heiwa ha ka 05-09-25 da khut yalang yow pynbait yeini heiwa da rai wa kani ka hukum wa pynbait pood ymtoh kawa khaddooh tangwa kawa chipor donhi yow wanrah yei suk, yow wai biang ya ki Tourist wa i khih i khan kitu kiwa yatoh wa kani ka kchaaid.
Ha uni u bnai won da chem wa kiwa chong chnong ka Umblai da sdang ki wow tih ya ka luti wa thymme yow lai cha kani ka kchaaid næ wow pynbha ya ka luti warim kawa lai na Arliang Riat cha kchaaid Weisawdong.
Deiwa leh kamni da tieñsar wa ye u mih i kynaad hapyrdi kini ki ar chnong, kamtæ da pynkrehkaam da ka Section 163 BNS yow khang yei yalang palat 5 ngut næ palat 5 ngut ha soodong ka kchaaid Weisawdong wa kynthup nadooh ki thaw lai kjat wa kattæ kamjooh na kiwon kiwon ki luti wa jngai 200 meter na ka kchaaid.
Da khang leh wow ya rah moo, rah dien, ki tiar yaleh, ki tiar yasiat lane kiwon kiwon kiwa ye wow pynemkaam yhow pynmynsoo bru.
Da ini da khang leh yei wan ki Tourist cha kani ka kchaaid.
Discussion about this post