U Montri ka sorkar jylla, u Wailadmiki Shylla ynne ka sngi da lai pait u yei kreh chna pynbha ya ka Aitnar yong ka Seiñraij Ialong kawa haap hapoh ka Constituency yong oo khnang yow pyntikna wa kani ka Aitnar u man ko kawa toh wa biang ya ki paidbah neibynta ka Behdieñkhlam ka Seiñraij Ialong.
Hawa klam, u Wailadmiki Shylla ong u wa hapoh ka Constituency yong oo sa du ka Ialong donhi ka wym pu yoh ya ka Aitnar wa biang katkam ka juk katni, kamtæ sñiawkmen u wa dei yakrehlang ki bru waheh ka Seiñraij kamjooh ki dkhot da ya thooh laad ki kammon u wanrah ki Scheme.
Wei lyngba i kyrpaad yong oo deilang ki bru waheh ka Seiñraij kamjooh ka chnong Ialong, neiliang u Symbood Montri Rangbah ka jylla, u Sniawbhalang Dhar leh da chimkhia u wow wanrah ya i roi i paar.
Heiwa najrong i tei i chna pynbha pynmiat ya ki luti syngkieñ ha kani ka chnong kawa man leh ka chnong wa em ya ki thaw uiñke suwari, da chna pynbha sa ya kani ka Aitnar kawa man i emkaam wa hakhmat dooh.
U Wailadmiki ong haroh u wa hanla yei pynkreh ym pu em dep chna lut nadong chadong, tangwa neibynta i emkaam ha ka Behdieñkhlam uni u snem da man kawa toh wa biang, neibhah ki bynta waheh waheh dadep lut sah sa du ki khian ki nai.
Neiliang u President ka Seiñraij Ialong, u P. Shylla da pynsñiaw u yei e khublei ya u Symbood Montri Rangbah, u Sniawbhalang Dhar kamjooh ya u MLA ka thaaiñ uwa man leh u Montri sorkar, u Wailadmiki Shylla hajrong i smat i pynkreh wa ka dak i jop yong ka.
Kamwa ka Behdieñkhlam ka Seiñraij Ialong u sdang ko nadooh ka 2 tarik wei u kut ko haka 10 tarik u bnai August, chim haroh u ya ka kabu wow khut sñiawbha ya ki paidbah ka Bri Ynñiawtrep wow wan sakhi ki ya ka Behdieñkhlam ka Raij Ialong myntu u snem.
Deiwa pynsñiaw u leh i kmen neibhah wa u sarok luti syngkieñ dadep chna lut waroh, ki thaw booh kari paidbah leh da man kiwa heh wei kyllooid hawa wyrchaw wa ki snem nachwa, najrong wa ki paidbah u yoh ki leh yei pyngngaad ka thaw.
Discussion about this post