U Montri Rangbah ka Meghalaya, u Conrad K. Sangma ynne da yachem u wa u Home Minister ka ri, u Amit Shah ha New Delhi deiwa emlang kiwa yahkhmat ki Balang waphær waphær wa kynthup ya ka Presbyterian Church of India (PCI), ka North East India Christian Council (NEICC), ka Catholic Church (Archdiocese of Shillong) wa ka Garo Baptist Convention.
Da emlang u Rev. H. L. Myrsing, Moderator, PCI; u Rev. S. C. Diengngan, Chairman, FCRA Sub-Committee, PCI; u Rev. Dr. Meyu Changkiri, General Secretary, NEICC; u Fr. Teiboklang Kharbani, Administrator, Archdiocese of Shillong wa u Durasal R. Marak, Youth Director, Garo Baptist Convention.
Ha ini i yachem wa u Home Minister da yaklam heiyatoh wa ki kyndon ka aiñ Foreign Contribution (Regulation) Act (FCRA), heiwa da em ki kyndon wa da tyrwa wow pynkylla noh wei daw ktah ki ya ki kaam wa pynlai da ki Balang nadooh ki thaw puræ, i e yarap wei chakri ya ka imlang sahlang hapoh Meghalaya.
Da khana wa kam ki Balang da pynlai ki boon tylli ki skur, ki College, ki Hospital wa kiwi de kiwa yarap ya ki paidbah ka jylla khamtam kitu kiwa em ha ki thaw wa jngai na sor.
Neiliang u Conrad da pynche wa ki kaam wa pynlai da ki Balang toh kiwa emkaam bha hapoh ka jylla wei kiwa yarap leh ya ka imlang sahlang, kamtæ da kyntu ya ka sorkar pyrdi wow pyrkhat yeini rukom man ha Meghalaya hawa pynkylla ya kani ka aiñ FCRA.
U Conrad da kyntu u ya ka sorkar pyrdi wow pyntikna wa kini ki kaam wa leh ki Balang toh u pteiñ i khlem da pynthut.
Kam wow kdaw heini wa kani ka aiñ FCRA toh kawa pait yei poi poisa na baar ri cha ki seiñ wa leh ya kiwa boon ki kaam hapoh ka ri wei da emkaam ki leh wow em ya ka License tangwa ha ki kyndon wa da thmu wow pynkylla, ka sorkar em ko i bor wow chimkti yeiwa da em da chna ka seiñ wa yoh yarap na baar ri lada tyngkheiñ kyndon ki.
Discussion about this post