Da wai ya ka Viewpoint wa em harood u sarok thymme ka Jowai Bypass

U Montri sorkar uwa man leh u MLA ka Jowai Constituency, u Wailadmiki Shylla, ynne ka sngi da wai paidbah u ya ka Viewpoint kawa ye u chynna ya ka sor Jowai deilang ki chariñ loom wa yoosuk yong ka deiwa emlang u Deputy Commissioner ka West Jaiñtia Hills District, u Abhinav Kumar Singh, u BDO ka Thadlaskeiñ C&RD Block, u Dr. H. Niang, u waheh chnong ka Khliehtyrshi, u Kitbok Rymbai najrong ki paidbah wa chong chnong wa kiwi.

Kani ka Viewpoint em ko ha Pdeiñ Chahtngit wa dang haap ha ka chnong Khliehtyrshi, kawa em hapoh ka Thadlaskeiñ C&RD Block wei em ko harood u sarok thymme Jowai Bypass wa pynyabi wa u sarok Jowai Dawki na Treiongriang wa u sarok Jowai Shillong ha Khliehtyrshi.

Ya kani ka Viewpoint da chna lyngba ka CM Catalytic Fund hapoh i pait i pynlai ka yung krehkaam u Deputy Commissioner ka West Jaiñtia Hills, wei yei thaw wa chna da mantre da ka Jaijai Rymbai.

U Wailadmiki Shylla hawa e i klam ong u ki thaw uiñke suwari toh kawi na ki laad wa yarap u pynku yei yoh i kot ha kini ki sngi.

Wei ha ki sngi wa dep chadien hanla ya uni u sarok ym pu em u wai leh da boon bha ki paidbah wa wan uiñke pyngngad neidaw wa yoosuk ki soodong sookun, kamtæ yooluti u wa neini chakhmat iwon iwon iwa mut wa thmu kiwa em thaw lyngba uni u sarok Bypass daw man iwa pynmyntoi ya ki.

Ong haroh u wa i wai ynne ka sngi ymtoh u kut ko du ka Viewpoint, tangwa neibynta i myntoi yonglang daw chna leh ki painkhana, ki dukan baam wa dukan pynyoo naam næ dai ya ki tiar tynre iwa chna wa thaiñ da ki bru kani hi ka thaaiñ.

Related posts

Nadooh ki yalehke Quarter ka World Cup u sdang pynyoo ha ka Football Fan Park ha Jowai

July 6, 2026

Bia biang u Aamir Khan hei rta wa 61 snem | I sien wa le

July 6, 2026

Chooh chooh u Wailadmiki ong u kamwa kani da man chwa ka thaw wa yoosuk, lada toh wa yoh da i thaw wa rap heh kamwa da e yumut u waheh chnong, neiliang yong oo u thooh u ki laad ki luti kammon u wanrah yeiwa emkaam, kamwa  ka chnat Tourism leh man ko kawa smat  bha u yarap  heiyatoh wa ki kaam uiñke suwari lada toh u chna ki thaw sah, thaw paitke wa kiwi kiwa man neibynta u pynku yei yoh i laa ka chnong ka thaaiñ kamjooh yow yoh khih ki khon khynroo khyllood.

Kamwa kani ka sngi toh i e kti leh ya kani ka Viewpoint, u Wailadmiki da yooluti u wow em i yakrehlang hapyrdi ki bor District, ka dorbar chnong wa ka tre thaw.

Kiwi won wa e i klam kynthup ya u Deputy Commissioner, u Abhinav Kumar Singh, u waheh chnong ka Khliehtyrshi wa kiwi.