Ka Behdieñkhlam ka Raij Jowai ynne ka 7 tarik ka Mulong dapoi ko cha ka sngi wa ar heiwa nyngkong dang step da pyndep ya ka Kñia Aitnar hapoh i pait i yoo u Dolloi, u Pator, u Langdoh, u Sangot, u Wasan wa kiwi.
Ki Kmairaij hadien ka Kñia Aitnar da yachem ki ha Myngkoipyrdi, Loompyrdi Iongpiah wa em ka yalang wa tbian wei da mih ki neini yow lai thooh ki ya ki Dieñkhlam na khloo wow wanrah chapoh ki thaw niam ha Iawmusiang katwa ki Khonraij won da lithooh ki ya ka Khnong Blai.
Hadien won da wanrah ya ki Dieñkhlam cha Iawmusiang da jar jiar ki chnong wa kynthup ya ka Panaliar, Loomiongkjam, Loomkyrwiang, Iongpiah, Tpep-Pale wa Dulong.
Neitæ won ka Khonraij da lai thooh ki ya ka Khnong Blai ya kawa da pynchong chipor ha Poh Sawiar (hajan ka yung krehkaam u DC, Jowai) wei da rah ya ka cha Loomsooyung (hajan Marian Hill HSS).
Ynne ka sngi ki khynnah chynrang wa kynthai wa ki waheh da chaad ka’it ki hei mynsien wa kmen hei kieh ki bom, ki bikur, ki chæng chæng wa ka bhuri.
U Dolloi ka Elaka Jowai da ong u wa ynne da pynpoi lut ya ki Dieñkhlam da ki Kmairaij ha ki Thaw Niam kam ha Madan Siat Thong, Madan Chaad Sukra, Madan Kñia Khad wa ha Madan Pynchongngiah Dieñkhlam wei hadien won ki Khonraij da pynchong ki ya ka Khnong Blai ha Loomsooyung.
Da pynphooh chooh chooh ya ka sngi deiwa wan sakhi ki kynthai kiwa riam ya ki sula wa phooh chirup wa i ksiar i rupa.
Discussion about this post