Ha i jia wa sñiawsih iwa da jia ha ka chnong Umdap Rngi, ki paidbah wa chong chnong deilang ki pulit ka Byrnihat wa ka Fire & Emergency Service ynne i janmiet da yoh ki wow sai ya iwi i metyap u bru wa chah tymmoh hei khyndaw hadien wa oor u loom ha ka yung trep wa sah u yow lai rep.
Katkam ka khubor wa da yoh, da suba wa ini da jia i nadooh ka 20 tarik uni u bnai heipor wa joor bha u slap uwa da neh boon kynta.
Da pyntip wa uni u bru toh uwa chong wa sah ha Byrnihat tangwa da jooh lai kreh u cha kani ka thaw rep deiwa sah miet ha chnong Umdap Rngi da boon boon snem.
Hadien wym em de liwan u cha yung, u diah u da suba u wa em iwa jia wei da lai u cha kani ka thaw heiwa da chem yei oor khyndaw wei da chah ban i yung trep, kamtæ da lai pyntip u wut-wut cha ki pulit ka Byrnihat.
Da wan poi wow yarap deilang ki bor chnong ka Umdap Dumu wa Umdap Rngi chirup ki pulit ka Byrnihat wa ki bru ka Fire & Emergency Service heiwa da sdang wow khyndang yei khyndaw deiwa pynemkaam da ka pooh chiloom.
Hadien i kreh chitom iwa da neh kamwa 3-4 kynta, heipor kamwa 4:00 waje i janmiet da yoh wow sai yei metyap uni u bru.
Discussion about this post