Ha ka yachemlang ki Montri ka sorkar jylla ynne ka sngi, da chim rai wow pynchlur ya ki paidbah wow pynemkaam da ki kari Electric Vehicle (EV) deiwa wanrah da ka Meghalaya Electric Vehicle (EV) Policy, 2026, yow e myntoi ya kiwa pynemkaam kari Electric ha waroh kawi ka jylla.
Ki Montri sorkar da mynjur ki leh yei tyrwa wow pynkhlan ya ki kaam pynmih bordiñ wa kynthup yei thung ya u Chief Technical Advisor wei wow su bai thaw neibynta u chna ya iwa emkaam wei yow pynpoi bordiñ.
Hawa yaklam wa kiwa thoh khubor, neiliang u Montri uwa man leh kam uwa e ktien ka sorkar, u Marcuise Marak da pynbna u wa ka sorkar daw e myntoi ko Rs. 25,000 cha man ki bru kiwa thied ya ki kari Electric. Najrong itæ ym emkaam u su bai Registration yow pynsuk leh ya kiwa kwah u kylliang ya ka kari ki da ka kari Electric kawa yatoh bor.
U Marak da pyntip u leh wa ha Meghalaya kattæ em palat 5000 tylli ki kari Electric wei kani ka Policy da yooluti wa daw nang pynboon ko yei em kini ki jait kari.
Da ong u wa kani ka Policy daw krehkaam ko ya ki kari ar chaka, le chaka wa ki kari soo chaka.
Hawa kylli, u Montri da pynsñiaw u wa ka sorkar ym yoo ko iyi iyi i eh yow booh ya ki Charging Station.
Ki Montri sorkar da yaklam ki leh hajrong ka Vehicle Scrappage Policy, wa da pynmih ha u snem wa dadep. Wei hapoh kani ki tre kari kiwa dai Scrap ya ki kari wa da rim palat 15 snem ye ki wow pynemkaam ya ki Certificate yow thied ya ki kari EV wa thymme yow yoh yei myntoi.
Discussion about this post