I kaam uiñke suwari ha Meghalaya da hiar bha i khamtam hadien wa mih i awri heipor wa pynman Rally ka KSU ha ka 19 tarik ha Shillong, heiwa da antaad wa 80% na ki Booking ha ki Hotel wa Homestay da chah pyndam (Cancel) ki.
Kiwa khih na i kaam uiñke suwari wa ka seiñ kiwa kamai na Assam da tieñsar ki lada pteiñ i kynaad neibhah wa da ki hajar tylli ki kari Tourist kiwa wan cha Meghalaya khamtam heipor ly’ur.
Kiwa kamai da khana ki wa da chah ktah bha i kamai yong ki wei da em leh kamwa 200 tylli ki kari Assam wa sahkut ha Meghalaya wa ki bru.
I kynaad ha Meghalaya da pynhiar i yei sñiaw chngaaiñ wow wan cha ka jylla deiwa ong wa kiwa kamai ye ki wow lai noh cha kiwi ki thaw ka Northeast lada pteiñ i chah thombor pyrchah ya ki.
Ka sorkar Assam wa Meghalaya da kyntu ki wow pynneh yei chongsuk hapyrdi ki ar liang.
Neiliang won ka Tour Operators Association of Meghalaya (TOAM), Meghalaya Rural Tourism Forum (MRTF), Tour Guides Association of Meghalaya (TGAM), Federation of Shillong Hotels (FOSH), Meghalaya Tourism Development Forum (MTDF) wa ka Meghalaya Rural Tourism Cooperative Federation Ltd. (MRTCFL) hadien wa chong yachem ha ka 20 tarik beiñ ki yeini wa jia ya ki kari wa wan na baar ka jylla wa kyntup nadooh ki kari Tourist wot kiwi de ki kari wei i chah dat chah bom ki paidbah wa lai luti.
Da ong ki waroh em hok wow pynman yei yakhih tangwa hap wow man kawa jai-jai ymtoh deiwa chim kabu wow pyntieñ pynsmiej.
Da pynkynmoo ki leh wa da yaleh chitom yow tipmit ka pyrthai ya ka Meghalaya kam ka thaw wa chngaaiñ tangwa ini wa jia kamni da ktah ko yei dur ka jylla wei khamtam ya kiwa khih ya ki kaam uiñke suwari wei kammon wow jia ya ki deiwa da em boon kiwa da Cancel neidaw wa da tieñ ki wow wan cha Meghalaya.
Da kdaw ki leh wa ha Meghalaya kamwa man kattæ hadooh 30% kiwa chong chnong toh kiwa yoh khih na ki kaam Tourism wei kiwa boon toh kiwa sah cha ki thaw wa em cha palatsor nadooh kiwa pynlai ya ki Homestay, ki Guide, kiwa kamai kari, kiwa chna tiar, kiwa em thaw baam wa kiwi de.
Discussion about this post