U Montri Rangbah ka Assam, u Himanta Biswa Sarma da ong u wa da pdiang u yeiwa mih na ka yachemlang u Deputy CM ka Meghalaya, u Sniawbhalang Dhar wa u Minister ka Assam, u Atul Bora ynne ha Guwahati deiwa yoh yei kular na ka sorkar Meghalaya wow chimkhia yeiwa dawa ki paidbah ka Assam wei da sñiawskem u wa i ya sñiawthooh wa i suk i saaiñ u wan smat i yow pynkhlan yei yatohlok.
Neiliang ka sorkar Meghalaya da pynsñiaw ko yei sihlet yeiwa jia ha ka 19 tarik ha Shillong deiwa kular wow pynchitom ya kitu kiwa emkti heiwa da kem leh ya kiwa yahkhmat ka KSU nadooh u President, u Vice-President wa u General Secretary deiwa pynngat ki hapoh ka aiñ Meghalaya Maintenance of Public Order Act najrong wa da Register ya 15 tylli ki FIR heiyatoh wa iwa jia ha katai ka sngi wei da tipmit leh ya ki 5 ngut kiwa kah yei durkhmat kiwa emkti wow tympiah tympra ya ki kari kiwa na Assam.
Da thung leh da ka Special Investigation Team yow chem ya kiwi de kiwa emkti wow leh pynsih ya ki kari kiwa na Assam wei yow pynchitom ki.
Da pyntip leh wa palat 3,700 tylli ki kari Assam da synraan ki yow ye ki wow mih na Meghalaya khlem da jia iyi iyi.
Heiyatoh wa kiwa pyntip cha ka Assam Control Room wa emkaam yarap, da ye wow lai pynlait ya 175 ngut wei kini kynthup ki ya kiwa wan da 22 tylli ki kari ki bru samen wa 5 tylli ki kari kamai. Wei ka Control Room ka Meghalaya da yoh ko 379 sien kiwa Phone yow paan yarap wei da yarap ya ki yow lai liwan ki.
Ki kari wa sahkut kiwa em kamwa 400–500 tylli kiwa neh cheiliang Meghalaya, da ye wow yahluti ki ha ki bynta ka nan Umiam yow lait ki.
Da pyntip leh wa hapoh 48 kynta daw lai yah ya waroh kiwa dang sahkut ki wym pu ye u poi cha Assam.
Daw thung leh da ki District-Level Joint Committees wow man dkhot da u Deputy Commissioner, Nongpoh wa u Deputy Commissioner, Kamrup Metropolitan, deilang ki heh pulit na waroh ar District wei kini ki Committee u pyntikna ki wa ye u pynbait lada jia iwon iwon ha ki bynta khappood.
Daw em leh ka Joint Committee wow emlang ki heh ka chnat Transport nadooh ki Commissioner/Secretary na waroh ar jylla deilang ki seiñ kiwa kamai Tourist yow pait yeiwa emkaam kiwa uiñke suwari ka Assam wa Meghalaya.
Ki ar sorkar daw leh ki yeiwa emkaam yow pyntikna leh wa ki kari wa lai luti na ki thaañ wa cha wah ka Assam wa kyntup ya ka Barak Valley lyngba ka Meghalaya wym chah pynthut ki.
Ka sorkar Meghalaya da ong ko wa u bahkhlieh ko yei bha i miat wa i chngaaiñ kiwa uiñke suwari kamjooh ki kari kiwa na Assam kamjooh kiwi ki jylla ka ri heipor wa em ki hapoh ka jylla.
Discussion about this post