Ka Meghalaya Society for Cultural and Folklore (MeSCaF) chirup i yakrehlang ka chnat Cultural and Creative Studies, NEHU, Shillong wa ka Kiang Nangbah Government College, Jowai, ha ka 22 taeik uni u bnai da pynemburom ki ya ka World Folklore Day ha District Library Auditorium, Mynthong, Jowai, hei emlang u Dolloi ka Elaka, u Puramon Kynjing kam u kongsan, u Wanphrang Gassah, District Librarian kam u symbood kongsan, hei sakhilang u Prof. Desmond Kharmawphlang, u Hercules Toi, Principal ka KNGC, ka Dr. Rimika Lanong, Executive Member MeSCaF, u Pynjanai Mallai, President MeSCaF wa u Barikupar Paswett, General Secretary MeSCaF.
Hawa klam kam u kongsan, u Dolloi da pynsñiaw u hajrong i emkaam u pynneh pynsah yei ktien tynre, ki sur ki rwai tynre, i chaad wa ki dustur-riti tynre wa da yoh pateiñ na ki manchwa longchwa.
Ong haroh u wa ki paidbah ka Meghalaya toh kiwa embhah neibhah man ki kiwa mahajon ha ki dustur riti, deiwa ban joor leh wow pynkrehkaam ya ki wei wow pynneh pynsah.
U Dolloi da kyntu u leh ya ki khynroo khyllood kiwa man ka pateiñ wow ñiawkor wei pynemkaam hok yei sap wa da yoh na ki manchwa iwa man kam i e sñiawbha yow pynyoo i chakri ya ka imlang sahlang.
Heijooh i por leh u burom yei ktien thylleij, ka dustur riti wa jooh pynkrehkaam.
Neiliang u Wanphrang Gassah, da klam u hajrong i emkaam u pynneh pynim ya ki riti dustur hanlada hap u lailuti deilang chirup wa i kylla ka juk katni. Wei pynsñiaw u leh yei bynta ki khynroo khyllood wa katni wa kammon u thooh yutip wei wow pynku chaphrang yei rwai tynre, ki ktien wa ki khana parom.
Neibhah ka Folklore ym mut ko du kat ya ka pateiñ wa da lai, tangwa man ko leh ka yingkieñ wow pteiñ cha ka mynried wow wan.
U Prof. Desmond Kharmawphlang khana u wa ka Meghalaya Society for Cultural and Folklore (MeSCaF), hanla man ko kawa dang dap chisnem i lai luti leh, tangwa da ye ko u pynman ki rynsan pynneh dustur ha Shillong wa ha Jowai, ha deilang i pynkhreh wow pynheh pynkrai ya ki kam sa ha kiwi won ki bynta ka jylla Meghalaya.
Ka Dr. R. Lanong da khana ko yei tynre wa i emkaam ka Folklore, wa yei kyntien “Folklore” da pynmih nyngkong da u English Scholar, u William Thoms ha ka snem 1864. Da batai bniah ko wa ka Folklore man ka laad wa khroo u pynneh pynsah yei ngait tynre, ki parom, ki rwai wa ka phang yow sñiawthooh ya ka dustur kawa wan pateiñ na ki manchwa longchwa.
Neiliang u Hercules Toi, hei klam pdiang sñiawbha yong oo ha kani ka sngi, ong u ka Folklore man ko kam i kynmoo wa im wa pynwandur ya ka imlang sahlang.
Wei man ko leh kawa emyatoh nsmo chibynta ka National Education Policy (NEP), khamtam hei wow pynku yei rukom puræ dustur tynre. Ha kani ka sngi da em leh i pynyoo rong ya ki jait tynre waphær waphær.
Discussion about this post