Uwi u khla Leopard uwa da mynsoo wa ye u man nei chah tyrrah kari ha u sarokbah ka Davanagere District ka Karnataka hei miet ka 7 tarik, wei hadien wa tip ki bru ka chnat Forest da lai ki cha kani ka thaw hei step ka 8 tarik yow lai e yarap tangwa da chah khyrrup chah phrat ki.
Ki bru sorkar da ong ki wa uni u khla toh uwa da mynsoo wei da dem u ha rood sarok Bengalure-Pune National Highway 48 wei katkam wa da yoo wa kawi ka khmat u toh kawa da takha kamjooh ki kjat dien u leh kiwa da kheiñ.
Tangwa manda poi kiwa kreh ka chnat Forest chajan uni u khla, da khyrrup wei da dait u ya ki heiwa uwi da mynsoo u malu mala wei da kit cha Hospital.
Da pyntip wa ini da jia hadien wa dep u siat dawai pynyohthiah ya uni u khla tangwa neidaw wa sdang ki paidbah wow yalang hajan deiwa ya chondur wei riñ dur wei ym pu em leh u krehkaam ini i dawai, uni u khla da toor u chajan ki bru ka chnat Forest heiwa da yoh u wow khyrrup wei pynoor ya uwi.
Uni khla da yoo leh wa hap u lai dei paar neidaw wa mynsoo hadien wa pynlait u ya uni u bru yow chong biang ha rood sarok.
Uni u bru da mynsoo u hei bynta ka kti wei da chah phrat leh ka kjat tangwa ym em mynsoo joor u.
Hadien wa jia ini waroh manda yoh thiah u khla deiwa krehkaam i dawai da kit ya oo cha ka thaw sumaar.
Discussion about this post