U pynman ka WJSU da ka Follow-Up Exam yow pteiñ i e Scholarship ya kiwa poi chakhmat

Ka Education Sub-Committee ka seiñ War Jaiñtia Students’ Union (WJSU) da pyntip paidbah ko wa daw pynman ko ya ka Follow-Up Examination 2026 yong ki Top-20, kiwa jop ha ka 2nd War Jaiñtia Scholarship Examination 2025 wa pynman ko ynnin u snem.

Ya ka Follow-Up Examination 2026 yong ka 2nd War Jaiñtia Scholarship Examination 2025 u man ko ha ka 3 tarik u bnai October 2026, ha Riwar Jaiñtia Church of God School, Ladjaplem heipor 9:00 waje i step hadooh 12:00 waje i pyrdi sngi.

Kamtæ da kyntu ya ki khynnah skur kiwa poi cha ka kyrdan Top 20  nadooh ka Section I, Section II wa Section III kiwa em ha ka List yong ka 2nd War Jaiñtia Scholarship Examination 2025, wow sñiawbha ki u man kiwa pynkhreh hei wow wan chimbynta ha kani ka laad ka kabu wa wai ka seiñ.

Ha kani ka Top 20 Follow-up Examination 2026, kiwa lehbha wei kiwa Pass bha kam ki Top 7 na kawi ka Section I, Section II wa Section III, ka seiñ daw e Scholarship ko Rs. 1200 chibnai samen neibynta 12 bnai, kam ka dak u pynchlur wei e mynsien yow yarap kynrong hei puræ puthi ki khynnah wa minot wei kreh chitom yow poi cha ka thong i im, khamtam ya ki khynnah wa wan na ki manyung wa duna i yoh i la.

Ka seiñ kyntu ko leh ya ki bei ki pa, kiwa sikai skur ka thaaiñ War Jaiñtia, Amlarem Civil Sub Division wow sñiawbha ki u synranlang ya ki khon næ ki khynnah skur wa wan chimbynta ha kani ka Top 20 Follow-Up yong ka 2nd War Jaiñtia Scholarship Examination 2025.

Related posts

Ye u wan ki bru ka sorkar pyrdi heiyatoh wa i tih mooyong ha Meghalaya: Santa Mary Shylla

September 10, 2026

Dap ki Social Media da ki dur yong ki snem 1980

September 10, 2026

Ki khynnah kiwa chah jied ha ka Top 20 Follow-up Examination 2026 yong ka 2nd War Jaiñtia Scholarship  Examination toh u poi ki 30 minit chwa u  sdang ka Exam, wei toh u rahlang ki ya ki Admit Card ka Exam 2025 næ ka ID Card ka skur ki.

Ka Education Sub-Committee pyntip haroh ko wa hadien ka Written Examination daw pynman leh ya ka Personal Interview ya ki khynnah skur yong ka Section I, Section II, Section III, heipor 1:00 waje i sngi hadooh 3:00 waje i sngi chibynta u pynmyllien yow pynproh jabieñ wei u man chlur ha ki Personal Interview.

Yooluti ki wa lyngba kani ka Follow-Up Examination ya ki khynnah skur wa wan chakhmat ha ka 2nd War Jaiñtia Scholarship Examination 2025, u nang pynskem chooh chooh ki yei stat i chemphang yong ki ha ki liang waroh i puræ wa emkaam hei im yong ki.

Neibynta u tip bniah ye u Phone ha u Education Secretary, u Heartcasing Dkhar- 9366081154.