Ka seiñ KSU hadien wa da yoh ujor na kiwa boon ngut ki bru hajrong i em i dawa poisa pyrchah aiñ da ki pulit ka Meghalaya ha u sarokbah ha ki bynta ka Mawkhanu wa Thangshalai. Kamtæ ynne ka sngi hapoh i yahkhmat u Alerick Kharjana, Education Secretary ka KSU CEC, da lai hiar ki cha Diengpasoh wa Thanglaskai wow sylli yeini heiwa ka seiñ da ong ko wa da chem wa ini toh iwa jia sakhiat.
Ki dkhot ka seiñ da riñ dur ki yeini yow pynsakhiat wei ka seiñ da ong ko wa da chem wa ki pulit chim poisa ki na ki Truck wei da em i ya pynbait wa waroh ki Truck kiwa kit ya ki tiar, ki mar pohkhyndaw wa ki kari kit mar baam hap ki wow su cha ki pulit Meghalaya Rs. 200 hadooh Rs. 500 chi Truck.
Ka seiñ da suba ko wa ya ini i kaam da pynbait da ki heh pulit lym kamtæ kammon kini ki pulit u nood ki wow dawa poisa kamni dei miet wa dei sngi wei kiwa yah Truck leh da e bait ki khlem artatien neibhah wa dem i ya pynbait.
Ka seiñ da kylli ko na ki bor pynlai ka East Khasi Hills District wa lada man kamni kiyi wa e bor lada toh u SP, u Vivek Syiem lane u DC, u Abhilash Baranwal wei ye u man ki Minister yong ka jylla leh embynta ki ha ini i kaam.
Da dawa na ka sorkar jylla wa toh u pynman ya ka takit wa laitlooid hajrong ini i kaam khnang wow ye u pyndooh jait ki hawa da leh pyn da ki bru wa ksoh ya ka aiñ.
Ka seiñ da dawa ko wow pyndam ko ya u SP ka East Khasi Hills District, u Vivek Syiem uwa da e laad ya kam kin ki kaam wow jia ki hapoh i pait yong oo wei kamjooh leh ya u DC.
Discussion about this post