Kiwa ngait niam Hindu ha Jowai da pynman ki ya ka lehniam Durga Puja ha Shiv Mandir Complex, Iawmusiang, Jowai wei ya ka puja da pynman da ka Sarbajanin Durga Puja Committee, Jowai.
Ynne i janmiet u Dolloi ka Elaka Jowai, u Puramon Kynjing da lai sakhi u ya kani ka lehniam ha kani ka Mandir dei synraan kiwa chakri niam wa kiwi de.
Neiliang kiwa kitkaam ka Committee da pynkup burom ki ya u Dolloi wei da e khublei ki leh ya kiwa synraan ya oo chirup wa u Reserve Inspector, u S. Manner.
Neiliang u Puramon Kynjing da sñiawkmen u wow embynta ha kani ka lehniam deiwa yaroh yei em i mynsien yakrehlang weiwa ye ki wow pynlai bait ya ka niam kawa yoo chongkun bha.
Da ong u wa kam u Dolloi hawa lai u cha kam kini ki lehniam e u yei yaroh ya ki bru kiwa kyrchaanlang wei e mynsien wow pyndep ya ka lehniam neibhah waroh ki niam hikai ki ya ka luti i suk neibhah khlem ini waroh ymye wow yoh yei kyrkhu na u Blai.
Chooh choh da kyntu u wow em i maya wei burom para bru ha kawon kawon ka luti i pyndep niam neibhah khlem ka niam ym em i kyrkhu wei khlem ka niam ym em i khana ya ka pateiñ yong ka jaitbru deiwa kitbok u leh ya waroh ha kini ki por.
Discussion about this post