U VK Jindal uwa man kam u papun u khynroo uwa dang 16 snem uwa da yap ha u bnai March uni u snem ha Shillong, da pynbaad u wa da chah pynyap u deiwa chah Inject yabor dei Drugs, kamtæ da dawa u wa toh u takit bniah boi emkti ki snar khayi drugs ka jylla.
U ksu u Jindal da chem wa yap u hei rukom wa rap phær heiwa da suba wa chah pynyap u ha ka 31 tarik u March, 2026 heiwa da chem ya oo na iwi i yung wa em ha Umpling.
U V.K. Jindal uwa man leh u Advocate, da ong u wa katkam ka Post-Mortem Report, da chem yei dawai Tramadol ha kpoh u ksu, wei dap um leh ki snier u iwa da pynman ya oo wow yap u. Da khana u leh wa da takha i snieh ktien u wei da em ki dak thyrnia ha waroh arliang ki kti u iwa da pynsuba joor wa yei drugs da Inject yabor hei doh i pran u.
Kam wow pynkynmoo wa hadien wa chem yei metyap na i yung wa em hajan Umpling, da pynbaad wa da em wa rah yei metyap u cha kani ka thaw da ki ar ngut ki bru kiwa chem ya oo wa da wiar yongbru u ha i bynta wa em ha tre ka yingkieñ heiwa da pynkit ya oo cha Bethany Hospital heiwa da pynbna wa da yap noh u da ki Doctor.
Nyngkong uni u khynnah da mih u na u yung u wa em ha Motinagar yow lai ke cha Laitumkhrah.
U Jindal da ong u wa ki bru wa suba wa leh yeini i kaam da yahbakla ki ya ki pulit heiyatoh wa i thaw wa chem ya uni u khynroo wei khlem da khana hok ki yei thaw wa chem ki oo. Da kam u leh wa i bichaar bniah da ka Forensic ya ki Mobile Phone yong kiwa chah pynbaad da yoo wa em i yaklam ha WhatsApp hapyrdi kiwa chah pynbaad wa kiwa suba kam kiwa khayi drugs.
Chooh chooh da pynbaad u wa uwi u bru uwa tip pyrtuid kam u Sunny uwa man leh kam uwa pynkhreh kot (Private Tutor) toh uwa e drugs ya u ksu u wa ya kiwi ki khynnah hachwa wow pynyatipmit wa kiwa suba toh kiwa khayi drugs. Da kam u wa kattæ kini kiwa khayi drugs da khyrwit ki wow pynngop ya ki khynnah skur kiwa dang khian i rta.
Hawa pynsñiaw wa u ksu yong oo ymtoh uwa kyrni drug, da ong u wa toh u khynnah wa puræ ha Assam Valley School, Tezpur la ar snem, wei da liwan u hadien wa kut ka Exam Class 10 ha ka 30 tarik u March, 2026.
Ki pulit da kem ki ya ki arngut ki bru heiyatoh wa ini kiwa tip kam u Ralph Nongrum wa ka Rina Kharshiing, wei waroh arngut dang em ki ha Judicial Custody wei daw rah biang ki cha Kasari ha ka 11 tarik uni u bnai.
U Jindal da kyntu u ya ki pulit wow kdong ya kiwa khayi drugs wa kiwi kiwa emkti deilang ki arngut wa chah kem, wei wow takit leh wa neiwon wan i drugs wei kammon da pynpoi cha ki khynnah skur.
Heijooh i por u Jindal da kyntu u ya ki bei ki pa wow man kiwa syndong ya ki khon deiwa pynsñiaw wa kiwa khayi drugs katni chlur bha ki wot hadooh wa lai tia cha ki khynnah skur hadooh ha pchem skur.
Puræ leh: Yap u khynnah wa wan chuti cha Shillong deiwa suba wa leh i drugs
Discussion about this post