Kam chibynta ki dkhot kiwa sikai Deficit kiwa em hapoh ka chatri yong ka Khasi Jaiñtia Deficit School Teachers Association (KJDSTA) kawa da sdang yei yakhih pep skur wa khlem booh por nadooh ka 11 tarik uni u bnai ha Shillong neidaw wa ka sorkar ym ap wei pynslem ko u pynkrehkaam yei dawa wa i eh i khoo ki da boon snem, kamtæ ynne ka sngi ka 12 tarik won da pynman yakhih kiwa sikai Deficit sa ha Jowai wa pynman da ka Jowai wa Amlarem Zone ha pchem ka Cathedral Parish wa dang chna thymme ha Moosalyngkat, Jowai.
Ha kani ka yakhih wa jai jai kiwa sikai da rahlang ki ya ki Placard wa da thoh ya ki mat dawa na ka sorkar wa kynthup nadooh ka CPF, i dawa wow pynlait ya ka DA, ka Arrear wa sahteiñ, u pynkrehkaam ya ka Pension Scheme 2023, u sangeh yei thmu yahbakla lyngba ka Scheme 2026, u phah noh ya ka poisa lyngba ka Contributory Provident Fund cha ka Central Account, neitæ u pyntikna yei lai bait lai ryntih i rukom krehkaam katkam ka aiñ wa kiwi.
Deiwa ong leh wym pdiang ki yei pynslem, i murieh wei iwon iwon i leh dei wym che. Ong haroh ki ymtoh u pynemkaam bakla yei bor yong ki.
Hei yaklam wa u J. Lyngdoh, President KJDSTA Jowai Zone ong u wa kam kiwa sikai Deficit dap ki dei sñiawdiaw neibhah la 2-3 snem ka sorkar ym bien ko u pynkrehkaam ya ki mat dawa yong ki.
Heiwa nadooh u 2024 da pyrchang ki da ka luti u yaklam chi yaklam tangwa ym poi cheiwon cheiwon leh kut du hei kular wei poi cha u pood wow chim ki da kani ka luti pynman yakhih.
Wot ynnin ka 11 tarik leh ka sorkar da phah ko i thoh cha ki wow ong wa i kaam da lai i chakhmat.
Heijooh i por kyrpaad haroh ki ya ki manbei manpa wa ki khynnah skur wow kyrchaan yei yakhih yong ki wei wow man leh kiwa yaichah neibhah wa kini ki mat dawa toh kiwa chonghok sakhiat ya ki u yoh.
Discussion about this post