Ynne ka sngi, ka Jaiñtia National Council JNC Central Executive Committee, hapoh i yahkhmat u President, u Sambormi Lyngdoh, da e dorkhat ko ha u Commissioner & Secretary ka Revenue and Disaster Management Department ka sorkar Meghalaya hajrong i dai ya i thaw wa heh 232.899 Hectare (2,328,990 square metre) wa haap happh ka chnong Umkyrpong, Elaka Sumer, East Jaiñtia Hills District.
Ka JNC ha ki sngi wa dadep da pynsñiaw ko yei pyrchah wa joor heiyatoh wa i pynkylla ya ki thaw ri-loom cha i pyrtuid ki Company wa na baar jylla wa kynthup ya ka Shree Cement Limited wei ha kani ka kynti won sa ya i thaw ha Umkyrpong.
Ini i pynkylla pyrtuid yei thaw toh i yong u Wom Chyrmang na ka chnong Jalaphet, wei da e cha ka “Kopili Cement (I) Private Limited” kam kawa thied ya i thaw kiwa em ha ki ar tylli ki pynbna lyngba ka Form-D wa da pynmih da ka Office u Deputy Commissioner, East Jaiñtia Hills District. Kitai ki thaw wa da boohlang haka Notice da pynyoo leh ya i dor yong ki iwa man kamwa Rs. 11.88 klur neibynta ki ar tylli ki thaw heiwa iwi iwa heh 1,525,990 sqm toh iwa hei dor Rs. 8,17,21,000 wei iwon iwa heh 804,000 sqm hei dor wa Rs. 3,71,08,453.
Ka JNC da pynsñiaw ko leh ha u Deputy Commissioner lyngba ka chithi ha ka 8 tarik u October 2026, deiwa kyrpaad wow pynysangeh chwa yeini deiwa pynbna paidbah bha rap bniah khamtam ha ki khubor jylla katkam ka kyndon yong ka Meghalaya Land Transfers (Regulation) Rules 1974.
Ka JNC da sñiawkhia joor ko yei thmu wow pynkylla ya kam ini i thaw wa rap heh yong ki tre jylla cha ka karkhana pynmih khyndaw-bilat ya kawa ka seiñ hi kheiñ ko kawa khlem yurim khamtam hawa kheiñ ya ki mar poh-khyndaw kiwa em da ki klur tangka.
Ka JNC da yoh khubor ko leh wa em kiwi ki jaitbru Tribal kiwa man kam ki tre chnong kiwa em yei bor poisa wow thied ya kini ki thaw tangwa khlem da pynsñiaw wei pyntip paidbah deiwa biang, kammon u yoh laad kini bru u leh yeini hapoh ka aiñ?
Lyngba ka dorkhat ynne ka sngi, ka JNC da kyntu joor ko ya ka chnat Revenue wow pynsangeh ya i thmu wow pynkylla yei pyrtuid i thaw wei kawon kawon ka Sanction kawa dang sahteiñ hadooh wa da bichaar bniah yeiwa da ujor wa da e katkam ka chithi. Wow phah ya u Deputy Commissioner wow e por u deiwa biang yow pyntip paidbah lyngba ki kot khubor yong ka thaaiñ wa kiwi kiwi ki rynsan paidbah.
“Lada ki bru yong i hi em kiwa ye wow thied ya kini ki thaw ha i dor yaaw iwa biang wei u chah pyndooh ya kitæ ki laad du neidaw wa ym yoh yutip ki iwa biang hawa kini ki thaw ym du ki thaw wa kamtu donhi tangwa em ki ya ki mar poh-khyndaw kiwa chongdor da ki klur, iyi wow jia ya ki pateiñ yong i lada kam ya kini ki thaw kiwa ye u wanrah yei yoh i kot wei kiwa e myntoi ya i khlem da e laad chwa ya ki bru yong i? Da kylli u President ka JNC u Sambormi Lyngdoh.
Discussion about this post