U President ka JNC, u Sambormi Lyngdoh da pyntip u wa da yoh ki ya ki kot ki sla kam ka sabut wow pynyoo wa ka Shree Cement da phah ko ya ka chithi cha u Member Secretary ka State Expert Appraisal Committee (SEAC), Meghalaya yow pyntip wa dadep ki wow su ya ka poisa kawa Rs. 1,08,75,000 cha ka Meghalaya State Pollution Control Board (MSPCB) kam chibynta ka bai Environmental Clearance (EC) wa ka Consent to Establish (CTE) wei kani ka chithi toh kawa em ya ka tarik 02-09-26.
Ha ka 08-09-26 ka SEAC da chong yaklam ko yeini heiwa da ong ko wa ka Shree Cement da pynkhreh ko ya iwa emkaam yow yada ya ka um, ka la’ær, i rukom pynlum pynlang yei jhep i jakhlia kamjooh yow chna ya ka Green Belt ha soodong kani ka karkhana.
Tangwa neiliang won ka State Environmental Impact Assessment Authority (SEIAA) ym pu em chim rai ko neidaw wa dang em ka Fact-Finding Committee wa da thung da ka sorkar jylla, da sñiaw ko wym pu biang u lai chakhmat yeini i kaam ha ini i por kamtæ da phah biang ko cha ka SEAC yeini i paan EC wa CTE ka Shree Cement.
Ini i paan bor ka Shree Cement yow tih moochuni toh iwa thymme (Fresh Application) ha i thaw wa em ha Lum Syrman Limestone Block-A ha i thaw wa heh 217.494 Hectare.
Neiliang u Sambormi da ong u wa da yoo lakam wa chah thied ka SEAC ha ka Shree Cement kawa da pdiang ya kani ka Application wot hawa kani ka kaam dang em ko hei takit ka Fact-Finding Committee, deiwa suba wa em iyi ræ iyi cha kylla neibhah u Member Secretary ka SEAC toh u Member Secretary ka MSPCB, u G.H. Chyrmang uwa man leh u bru uwa pynlai ya ka Public Hearing ka Shree Cement.






Discussion about this post