Ynne ka sngi ha ka yalang wa tbian, ka Hynñiewtrep Border Dispute Redressal Forum (HBDRF) da kynmoo warom ko ya ka lyngkhooh dap soo snem i chah siat yap ki san ngut kiwa chong chnong ka Mukroh, West Jaiñtia Hills District iwa jia ha i step yong ka 22 tarik u Khonchonglad (Nov) 2022.
Ha kani ka step yong kani ka sngi, kini ki san ngut da chah siat yap ki ha ki ktang suloi yong ki Asam Forest Guard wa Assam Police heiwa da dooh yei mynsien u Chirup Sumer, u Thal Shadap, u Tal Nartiang, u Nikhasi Dhar wa u Sik Talang.
Ya kini ki 5 ngut da siat hadooh wa yap neidaw wa ki Assam Forest Guard wa Assam Police da pynbaad ki wa wan kit dieñ tooh ki napoh u pood u ang yong ka Assam. Tangwa i sakhiat toh wa kini ki bru da wan kit ki ya kini ki dieñ napoh u pood u ang ka chnong yong ki hi (Mukroh) iwa da kam yabor da ka Assam wa Karbi Anglong Autonomous Council.
U Chairman ka Forum da ong u, “Wot hadien soo snem nawa yap ki leh dang kynmoo u yeiwa kai wa tooid i snam kini ki 5 ngut ha sarok”.
Katkam ki laad pathai khubor da yoh yutip wa ha ka 30 tarik u September 2023, u Chief Minister ka Assam wa Meghalaya da mynjur ki u rah da ka CBI wow takit ya ini wa jia. Tangwa hadooh katni ym pu em leh yeini. Ka sorkar Meghalaya da thung ko da ka Investigation Team wa yahkhmat da u Judge (Rtd.) u Justice T. Vaiphei wei kani leh ym poi ko cheiwon cheiwon.
Ka Hynñiewtrep Border Dispute Redressal Forum leh da thoh ko cha ka Meghalaya Human Right Commission heiyatoh wa ini wa jia heiwa ka MHRC da e jubab ko wa kani ka thaw dang haap ko hapoh i kajia pood, kamtæ ym ye u leh iyi iyi du neiliang ka Meghalaya.
Ka sorkar Assam da pyrchang ko arsien le sien u khut ya kiwa chong chnong ka Meghalaya wow Report namo wow wan e ki sakhi satar heiyatoh wa ini wa jia, tangwa neiliang kiwa chong chnong yong ka Meghalaya ym bien ki u e jubab neibhah ini i thaw dang haap i hapoh u pood u ang ka Meghalaya wa da kam yabor hi-eh da ka Assam.
Ha ka 5 tarik u December 2025 kiwa chong chnong ka chnong Mukroh da e ki dei thoh cha u Governor ka jylla Meghalaya heiyatoh wa ini ka Case, tangwa ini leh ym poi i cheiwon cheiwon.
Hadooh kini ki sngi, kini ki san ngut ym pu yoh ki yei bichaar iwa hok kamjooh ka yung ka sem yong ki.
Kamtæ ha kani ka lyngkhooh sngi yap wa soo yong ki, ka Hynñiewtrep Border Dispute Redressal Forum da pynkynmoo wei da kyrpaad ko ya ka sorkar wym toh u mylliñ ko yeini wa jia, emkaam wow chimkhia ko u pynyoh yei hok kini kiwa da dooh noh yei mynsien ki.
“I chah siat yap kini ki 5 ngut man i i pyntieñ pynsmiej ya i, man i leh kam i e bor e mynsien ya i wow yeiñ yaleh hadooh wa yoh i ya u pood u ang uwa pura,” pynkut ka Wyrta na u Chairman ka HBDRF, C. Sungoh wa ka Secretary, ka S. Talang.





Discussion about this post