Ha ka Dorbar Tlang wa chi sngi ka JHADC kawa da man ha ka 20 tarik uni u bnai, u Gresentus Susngi, MDC ka Liang Pyrchah na Nangbah Mihmyntdu, da wanrah u ya ka phang yatai hajrong i chah ktah kiwa chong yaw wa ki dukan yong ki tre chnong neiwa wan ki dukan heh wa ka yaaw Online hapoh Ri-loom Jaiñtia.
I wan kini ki yaaw ong u ktah ki yei dor i mur wa i ye i dai ki tre chnong, neitæ chah ktah leh ka yarong poisa ka Council neidaw wym em iwon iwon i su cha ka Council.
“I wanrah ya kani ka Motion toh neidaw wa kwah pynku ya ki bru ka thaaiñ, wei ym mut leh u pyndooh ya kiwa wan, tangwa u thooh lad leh kammon u pynneh pynsah yei khayi pateiñ ki tre ri Jaiñtia,” da ong u Gresentus.
Hawa kyrchaan ya kani ka Motion, u Nehimaia Lamare da ban joor u ya ka EC wow paitbniah ko yei rukom wan kini ki jait yaaw.
U Jamshaphrang Pohtam won ong u wa hawa pait yei yoh myntoi emkaam leh u pait yei dooh myntoi.
Hawa pynche, u EM wa pait ya ka khayi pateiñ, u Bisonroy Iano, ong u kani toh ka mat wa dang thymme wei oo man u uwa smat u yakrehlang wei yaphyllu hajrong kammon u paitbniah ya kani ka phang wei yeini ong u daw rah yaklam leh hapoh ka EC.





Discussion about this post