Shillong: Kiwa chnong chnong ka Mawmaram ha ka miet yong ka 5 tarik da kem ki ya uwi u bru uwa thmu wow slaitbor ya kawi ka khynnah kynthai ha ka 3 tarik uni u bnai heipor kamwa 2 chiteiñ i sngi wei ya uni u bru da tip pyrtuid kam u Jansing Rani uwa da pooh leh ya ka da u wakhu arsien na khlieh kani ka kynthai kawa dang 14 snem. I chnong tre uni u bru toh na Manai wei da wan chongkha u ha Mawmaram.
Katkam wa pyntip kiwa chong chnong, ha ka 3 tarik katai ka khynnah kynthai da mih ko na yung wow lai sait-that ha kawi ka wahdooid kawa em hajan i yung sah yong ka tangwa uni u bru da patah yabor u ka cha khloo dei thmu wow slaitbor ka.
Da pyntip wa uni u bru da kdoh u ya ki kti ki kjat kani ka khynnah wei da dat (deiwa pooh) u leh arsien na khlieh yong ka tangwa da smat wan noh ki bru wa sñiaw yei kiad i yaam kani ka khynnah wei wei da yut wot u na ini i thaw.
Ya kani ka khynnah da chem da kiwa hayung hasem wa kiwa chong chnong hapyrdi i mynsoo wa joor bha wei ymtip yong bru de ko wei da pynkit noh ya ka wow chah sumaar ko wei katni da booh ya ka ha ICU ka Woodland Hospital, Shillong.
Ha ka janmiet ka 5 tarik ka chnong da pynman ko da i yang khap ya u Jansing wei da yoh ki wow kem oo na yung wa sah u wei da rah ya oo wow bichaar yeiwa leh u.
Ki paidbah hadien wa tip ki wa da yoh kem ya u Jansing da mih lut ki na yung ka chnong wow e pynchitom ya oo tangwa da ye kiwa pyllai ka chnong wow pyllait oo nei mynsoo wei hei takit ka chnong Mawmaram waka Mawsawa-Umdishit, u Jansing da phla u wa da leh u ya itai i kaam wei da thmu u leh wow slaitbor ya kani ka khynnah.
Ki pulit mar wa yoh yutip ya ini wa jia da poi ki wut wut cha kani ka chnong wei da kem noh ki ya u Jansing wow pynman ya i takit.
Discussion about this post