Jowai: Ka khubor wa dang yoh biang heiyatoh wa i jia ha Trangblang ynne ka sngi heipor kamwa 2:30 nohchariñ ka sngi da em i jia wa sñiawsih heiwa da chah tynyap le ngut ki bru na ka chnong Amlanai, West Jaiñtia Hills.
Kini ki le ngut kynthup ki ya u Waheh Chnong ka Amlanai uwa man leh kam u President ka Seng Nongrep, u Thomlin Surong (54 snem), u Secretary Chnong, u Hamboi Langshiang (40 snem) wa u Shanbor Khoniong (36 snem).
Ini da jia i heipor wa kini ki le ngut chirup wa kiwi ki le ngut dang liwan ki na Amlarem cha Amlanai wei manda poi ha Trangblang ki damok da pynsangeh ka kari wa chong ki heiwa da chah dat ki da ki dieñ hadooh wa da khlaad kini ki le ngut pyn ha ini i thaw.
Da ong wa ini da jia hadien wa u Ross Manner da kajia u wa u Thomlin Surong ha ka 3 tarik uni u bnai wei da chah dat u leh ha kiwa chong chnong ka Amlanai ha kani ka sngi yeiwa da ujor u (Ross) leh ha ki pulit ynnin ka 5 tarik.
Mar ya tip yeini neiliang ki bor pulit da lai ki wut wut cha kani ka thaw wei da kem ki ya ki ynru ngut kiwa emkti wow tynyap ya kini ki le ngut.
Kini ki ynru ngut kynthup ki ya u George Manner, u Ross Manner, u Lasawki Manner, u William Carey Manner, u Khamtilang Myrlia wa u Namdi Manner wei da pyngngat ya ki ha ki kyndon tynyap bru wei dang pynman ya ka takit hajrong ini.
Neiliang ka Sub-Divisional Magistrate, ka DM Suja khnang wow wanrah yei chongsuk ha kini ki ar chnong ynne i janmiet da pynkrehkaam noh ko da ka kyndon 144 CrPC khnang wow wanrah yei chongsuk da khang wow yalang ki bru palat san ngut kamjooh leh wow rah ya kiwon kiwon ki tiar pynmynsoo
Discussion about this post