Wan yaklam kiwa kreh ka ka District Mental Health Programme wa ki khynnah skur wow yada nei chim noh yei mynsien

Jowai: Kam chibynta wow pynsñiawthooh ya ki khynnah skur wa dang khai khynroo kawa man leh kam chibynta yong ka National Suicide Prevention Week kawa nadooh 9-15 uni u bnai neiliang kiwa kreh hapoh ka District Mental Health Programme, Jowai Civil Hospital, Ialong. Ynne da pynman ki ya ka yalang pynsñiawthooh ya ki khynnah wa puræ Class XI Arts ka Government Boys Higher Secondary School, Jowai.

Neiliang ka Shelomi Syngkon, Clinical Psychologist waka Diana Tongper Psychiatric Social Worker da khana ki ya kiwa boon ki daw wa chim ki bru pyn yei mynsien nadooh wa kyrni ki jait dih pynmuaid, i chitom sñiaw diaw mynsien namo i Depression, wa rem heiwa thmu u leh, i dooh ya kiwa maya wa kiwi kiwi de ki daw kiwa man i kjut wym chait i pyrkhat wei boon toh kiwa ye u pynchait biang.

Da pynchlur ki ya ki khynnah wow nynkong u maya ki pynda ki ya ki hi lada man kiwa lieh wa yong, wa sngaid wa rkhoh wa tbian wa jrong wei wow pyndap da ki kaam wa bha kiwa leh ki wei kamjooh wow yarap ya ki lok ki jor lada yoo ki wa da sdang kylla ki neiwa jooh man ki kamwa chong yung bait ki, dam ki u leh ya ki kaam wa ka-it wei emkaam wow ap yeiwa ong kamjooh leh wow tyrwa yarap ya ki.

Da klam ki leh chaphang i yalang chan wei kammon u sñiawthooh ki yei maya wa iwon i wymtoh i maya wei manda bakla ye ko leh u wanrah yei sñiawsih wa joor hadooh wow poi cha u pood wow pynkut yei mynsien.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Da khana leh ya kiwa boon i kjut i chitom i pyrkhat pyrdaiñ kam ka Post Traumatic Stress Syndrome, Schizophrenia, Cognitive and Development Disorder heiwa em cha i da sñiawthooh bakla ki kam ki bru wa yoh taro, thlen, toh ske wa kiwa yoh ksuid.

Kini waroh lada ym yoh yarap ki daw ktah lang ko ya kiwi kiwa ha yung ha sem lada ym sñiawthooh ki yi jia ya ki.

Da klam chaphang ki jait ngiah namo ka Stress kiwa em soo jait ka Eustress, Distress, Hyper Stress wa Hypo Stress heiwa ka Eustress man ko kawa bha kawa mih na i kreh hi manda hun ki bru kamjooh ha samen yei kaam wa kreh kamjooh manda poi thong, katwa kiwa em Distress, Hyper Stress wa Hypo Stress toh kiwa ktah ya ki bru wei toh u yait ya ki kiwa ye u pynman ya ki bru hadooh wa ye ki u pynkut yei mynsien yong ki.

Ya kam kani ka jooh ka e sikai da dep pynman ha kiwa boon ki skur hapoh ka WJH wei da e sikai ya ki khynnah wa chong Class nadooh 8-12.

Ya kiwa emkaam ya ka yasyllok namo ka Counselling ye ki leh u lai ha ka kamra 309 wa em ha Jowai Civil Hospital, Ialong.