15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Dawa ka Congress wow takit ka JPC yei rukom thied lieñsuiñ Rafale ka sorkar u Modi

0 Comments
Advertisement ad1
Advertisement ad1
Advertisement ad1

Jowai: Ka West Jaiñtia Hills District Congress Committee, (WJHDCC) Jowai ynne ka sngi da phah dorkhat ko cha u President ka ri u Ram Nath Kovind lyngba u DC wa thymme ka West Jaiñtia Hills u LSN Dykes Garod heiyatoh wa i kaam wym ye de u maap wa da leh da ka sorkar u Modi heiyatoh waka Rafale Scam.

Ha ka dorkhat da ong wa u Modi da pyndam u ka ka International Tender wow thied ki 126 tylli ki lieñsuiñ ya siat wei da rai noh u wow thied du 36 tylli deiwa tyngkheiñ ya waroh ki kyndon aiñ wow khut Tender kawa tip kam ka Defense Procurement Procedure wei da leh u ya ini khlem yohbor na ka Cabinet Committee chwa wow rai wow thied 36 tylli ki lieñsuiñ Rafale haka 10-04-15.

Advertisement ad1

Da ong leh wa ini i leh u Modi ymtoh iwa khooid hadooh wymtip de katwon i dor kini ki lieñ suiñ hadooh wa ka montri yada ri ka Nirmala Sitharaman hawa yaklam wa kiwa pathai khubor ha Raksha Bhawan ha ka 17-11-17 da phah ko ya u Defense Secretary wow pynbna paidbah ya i dor tangwa katni won ym bien de ko wow leh ya ini hadooh wa u President ka France u Emmanuel Marcon ha ka 08-03-18 da ong u wa ym em murieh yei dor wei chong ha ka sorkar u Modi wow leh ya ini.

Heijooh i por da ong leh wa ka Indian Air Force emkaam ko ym duna ya 126 tylli kini ki lieñ suiñ kawa da pynbna da ka sorkar ka Congress ka UPA tangwa u Modi won da chim u ka rai wow thied du 36 tylli iwa daw ktah yei man skem ka rai wow yada pyndaka yaka hi.

Kamtæ ka Congress da dawa ko wow phah ya kani ka kaam cha ka Joint Parliamentary Committee (JPC) wow takit ya ini i dooh nong wa T. 41,000 Klur nadooh ki rukom e Contract cha ka Company Reliance kawa da yoh Contract hadooh T. 1,30,000 Klur (T. 30,000 Offset Contract + T. 1,00,00 Klur ‘Life Cycle Contract’).

Ka Congress leh da ong ko wa i pyndam u Modi ya ka International Bid deiwa thied thymme noh ya 36 tylli ki lieñ suiñ heidor wa Euro 7.5 Billion (T. 1670.70 Klur ka wi) iwa da poi T. 60, 145 Klur wa chemdien naka bui ka Dassault Aviation wa naka Reliance da chem wa T. 41, 205 Klur ymtip cheiwon lai ko.

Share this:
Previous

Wan yaklam kiwa kreh ka ka District Mental Health Programme wa ki khynnah skur wow yada nei chim noh yei mynsien

Next

Yoh ka WJH ya ka National Award kam kawi ka District hapoh ka ri wa pliah u pynkrehkaam ya ka MGNREGS