Shillong: U Chief Executive Member ka Khasi Hills Autonomous District Council (KHADC), u Latiplang Kharkongor da ong u wa ha i yachem wa u Montri ka kaam pohyung ka sorkar India, u Amit Shah, ki MDC da rah bait ki ya ka rai wa da chim ha ka dorbar tlang wa dang dep wow pyrchah bait ya ka Citizenship Amendment Bill ha waroh kawi ka jylla.
Neiliang u Chairman ka KHADC, u Pynshngain N Syiem da pynbaad u wa ki MDC ka United Democratic Alliance (UDA) wa da chah beh na i bor ym em u poi ki cha ka yalang wow lai yaklam hajrong kani ka phang wa ktah ya ki jaitbru khian paaid.
Da ong u leh wa ini i leh ki MDC ka UDA da pynyoo che i wa ym em ki i kitkhlieh neibynta i ya i im ka jaitbru tangwa kwah ki wow em hei bor donhi.
U PN Syiem da ong u wa ki MDC ym hun ki yei yaklam wa u Amit Shah neibhah wa ya ka CAB u pynlait du na ki thaw Sixth Scheduled, katwa ka rai wa da chim da ka dorbar ka KHADC toh wow pynlait bait ya ka jylla waroh kawi na kani ka aiñ.
Ha iwi i liang ki MDC ka United Democratic Forum (UDF) wa synchaar ha KHADC da pynsñiaw ki yei phylla wa ka sorkar jylla ym em u khut ko ya ka Executive Committee wa yahkhmat da u Kharkongor wow yaklam hajrong ka CAB, tangwa ya ka dorkhat da phah du cha u Secretary ka Council.
Discussion about this post